ନୂଆଦିଲ୍ଲୀ: ଶାହିନ ବାଗ ଗୁଳିକାଣ୍ଡ ଘଟଣାର ଅଭିଯୁକ୍ତ କପିଲ ଗୁଜରକୁ ସାକେତ କୋର୍ଟ 2ଦିନିଆ ପୋଲିସ ରିମାଣ୍ଡରେ ପଠାଇଛନ୍ତି । କପିଲକୁ ଗୁରୁବାର ପୋଲିସ କୋର୍ଟରେ ହାଜର କରିବା ସହ ରିମାଣ୍ଡ ପାଇଁ ଅପିଲ କରିଥିଲା ଦିଲ୍ଲୀ ପୋଲିସ । ଶାହିନ ବାଗରେ ପ୍ରଦର୍ଶନ ସମୟରେ କପିଲ ଗୁଳି ଚଳାଇଥିଲା । ପୋଲିସ ଏବେ କପିଲକୁ ରିମାଣ୍ଡରେ ନେଇ ପଚରା ଉଚୁରା କରିବା ସହ ଘଟଣା ପଛରେ କିଛି ଷଡଯନ୍ତ୍ର କିମ୍ବା କୌଣସି ସଙ୍ଗଠନର ହାତ ଅଛି କି ନାହିଁ ଏବାବଦରେ ଅଧିକ ତଦନ୍ତ କରିବ ।
ଦିଲ୍ଲୀର ଶାହିନ ବାଗରେ ଗତ ଦେଢ ମାସ ଧରି ନାଗରିକତା ସଂଶୋଧନ ଆଇନ ବିରୋଧରେ ପ୍ରଦର୍ଶନ ଜାରି ରହିଛି । ପ୍ରଦର୍ଶନ ସମୟରେ କପିଲ ଗୁଳି ଚଳାଇଥିଲା । ସେ ଯୁକ୍ତ 2 ଡ୍ରପଆଉଟ ହୋଇଥିବାବେଳେ କୌଣସି ସଙ୍ଗଠନ ସହ ଜଡିତ ନଥିବା ନିଜ ବୟାନରେ କହିସାରିଛି । ପୂର୍ବରୁ ଜାମିଆ ଅଞ୍ଚଳରେ ପ୍ରଦର୍ଶନ ସମୟରେ ଜଣେ ନାବାଳକ ଗୁଳି ଚଳାଇଥିଲା । ଏଥିରେ ଜାମିଆର ଜଣେ ଛାତ୍ର ଆହତ ହୋଇଥିଲେ ।
