ହାଇଦ୍ରାବାଦ: ଆସନ୍ତା ଜୁନ 21ରେ ତେଲେଙ୍ଗାନା ସରକାର କାଲେଶ୍ବରମ ଉଠା ଜଳସେଚନ ପ୍ରକଳ୍ପର ଉଦ୍ଘାଟନ କରିବେ ବୋଲି ସରକାରଙ୍କ ପକ୍ଷରୁ ସୂଚନା ଦିଆଯାଇଛି ।
ଏହି ଉଦ୍ଘାଟନ ଉତ୍ସବରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ, ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇଏସ୍ ଜଗନ ମୋହନ ରେଡ୍ଡୀ ଓ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଯୋଗଦେବାର କାର୍ଯ୍ୟକ୍ରମ ରହିଛି । ତିନି ମୁଖ୍ୟମନ୍ତ୍ରୀ କନ୍ନିପଲ୍ଲୀ ନିକଟରେ ଥିବା ତିନୋଟି ପମ୍ପର ସ୍ବିଚ୍ ଅନ କରି ପ୍ରକଳ୍ପର ଉଦ୍ଘାଟନ କରିବେ ।
କାଲେଶ୍ବରମ ଉଠା ଜଳସେଚନ ପ୍ରକଳ୍ପ ଗୋଦାବରୀ ନଦୀ ଉପରେ କନ୍ନିପଲ୍ଲୀ ଓ ମହାଦେବପୁର ମଣ୍ଡଳ ଅଞ୍ଚଳର 45000 ଏକର ଜମିରେ ନିର୍ମିତ ହୋଇଛି । ଏହା ଗୋଦାବରୀ ନଦୀରୁ 235 ଟିଏମ୍ସି ଜଳକୁ ବିଭିନ୍ନ ସ୍ଥାନରେ ଉପଯୋଗ କରିବାରେ ସହାୟକ ହେବ । ତେଲେଙ୍ଗାନା ଗଠନ ହେବା ପରେ ଏହା ହେଉଛି ପ୍ରଥମ ବୃହତ୍ ପ୍ରକଳ୍ପ ।
