ନୂଆଦିଲ୍ଲୀ: ଜୟ ଶ୍ରୀରାମ ନାରାକୁ ନେଇ ପଶ୍ଚିମବଙ୍ଗରେ ଥମୁନି ବିବାଦ । ତେବେ ବଙ୍ଗଳା ସଂସ୍କୃତି ସହ ଜୟ ଶ୍ରୀରାମ ନାରାର କୌଣସି ସମ୍ବନ୍ଧ ନାହିଁ ବୋଲି କହିଛନ୍ତି ଅର୍ଥନୈତିଜ୍ଞ ଅମର୍ତ୍ତ୍ୟ ସେନ । କେବଳ ଲୋକଙ୍କୁ ବାଡେଇବା ପାଇଁ ଏହି ସ୍ଲୋଗାନର ବ୍ୟବହାର କରାଯାଉଛି ବୋଲି ସେ କହିଛନ୍ତି ।
କୋଲକାତା ଯାଦପୁର ବିଶ୍ବବିଦ୍ୟାଳୟରେ ଅନୁଷ୍ଠିତ ଏକ ସଭାରେ ଏହି ପ୍ରତିକ୍ରିୟା ରଖିଛନ୍ତି ଅମର୍ତ୍ତ୍ୟ ସେନ । ପୂର୍ବରୁ ପଶ୍ଚିମବଙ୍ଗରେ ରାମନବମୀ ଅତି ଆଡମ୍ବରରେ ପାଳନ ହେଉଥିବା କେବେ ଶୁଣିନଥିଲି । ହେଲେ ବର୍ତ୍ତମାନ ଧୁମଧାମରେ ରାମନବମୀ ପାଳନ ହେଉଥିବା ଦେଖିବାକୁ ମିଳିଛି ।
ମୋ 4 ବର୍ଷର ନାତି କେଉଁ ଭଗବାନଙ୍କୁ ଅଧିକ ଭକ୍ତି କରେ ପଚାରିଲେ ସେ ଉତ୍ତରରେ ମା ଦୁର୍ଗା ବୋଲି କହିଥାଏ । ରାମନବମୀର ତୁଳନା ମା ଦୁର୍ଗାଙ୍କ ସହ କେବେ କରି ହେବନାହିଁ । ନିକଟରେ ଜୟ ଶ୍ରୀରାମ ନାରାକୁ ନେଇ ହେଉଥିବା ରାଜନୈତିକ ସଂଘର୍ଷକୁ ନେଇ ପ୍ରତିକ୍ରିୟା ରଖିଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ।
