ନୂଆଦିଲ୍ଲୀ: ଜନସେନା ଦଳ ମୁଖ୍ୟ ପୱନ କଲ୍ୟାଣ ନବନିଯୁକ୍ତ ବିଜେପି ମୁଖ୍ୟ ଜେପି ନଡ୍ଡାଙ୍କୁ ତାଙ୍କ ବାସଭବନରେ ଭେଟିଛନ୍ତି । ଗତ 16 ତାରିଖରେ ଉଭୟ ଦଳ ଆନ୍ଧ୍ରପ୍ରଦେଶରେ ମେଣ୍ଟ ଗଠନ କରିଛନ୍ତି । ତେବେ ବିଭିନ୍ନ ଦଳୀୟ ପ୍ରସଙ୍ଗରେ ଉଭୟ ନେତା ଆଲୋଚନା କରିପାରନ୍ତି । ଆସନ୍ତା 2024 ନିର୍ବାଚନ ପାଇଁ ଉଭୟ ଦଳ ବର୍ତ୍ତମାନ ଠାରୁ ପ୍ରସ୍ତୁତ ହେଉଥିବା ଜଣାପଡିଛି ।
ଆନ୍ଧ୍ରପ୍ରଦେଶର ନୂତନ ରାଜଧାନୀ ଅମରାବତୀକୁ ନେଇ ଅନେକ ବିବାଦ ଦେଖାଯାଉଛି । ଗୋଟିଏ ପଟେ ୱାଇଏସ ଜଗନ୍ମମୋହନ ରେଡ୍ଡୀ ଓ ଅନ୍ୟପଟେ ପୱନ କଲ୍ୟାଣ । ୱାଇଏସ ଜଗନ୍ମମୋହନ ରେଡ୍ଡୀଙ୍କ ସରକାର ତିନି-ରାଜଧାନୀ ନୀତିକୁ ଗ୍ରହଣ କରିଥିବାବେଳେ ପୱନ କଲ୍ୟାଣ ଏହାକୁ ବିରୋଧ କରୁଛନ୍ତି । ଅମରାବତୀରେ ହିଁ ରାଜଧାନୀକୁ ରଖିବାକୁ ଜନସେନା ଦଳ ପକ୍ଷରୁ ପ୍ରଚେଷ୍ଟା କରାଯାଉଛି ।
ସେହିପରି ଗତ ସୋମବାର ଜଗନ୍ମମୋହନ ରେଡ୍ଡୀ ସରକାର ତିନି-ରାଜଧାନୀ ନୀତିକୁ କ୍ୟାବିନେଟରେ ପାରିତ କରିଛି । ଯାହାକୁ ନେଇ ତେଲୁଗୁ ଦେଶମ ପାର୍ଟି ପକ୍ଷରୁ ପ୍ରବଳ ବିକ୍ଷୋଭ କରାଯାଇଛି ।
