ନୂଆଦିଲ୍ଲୀ: ଜାମିୟାମିଲିଆ ଇସଲାମିଆ ବିଶ୍ବବିଦ୍ୟାଳୟର ହିଂସାକାଣ୍ଡ ଘଟଣାରେ ପୋଲିସ ମାଡ଼ରେ ଆହତ ହୋଇଥିବା ସମସ୍ତ ଛାତ୍ରଛାତ୍ରୀଙ୍କ ଚିକିତ୍ସା ଖର୍ଚ୍ଚ ବହନ କରିବ ବିଶ୍ବବିଦ୍ୟାଳୟ ପ୍ରଶାସନ । ଆହତ ଛାତ୍ରଙ୍କ ଘରକୁ ଗସ୍ତ କରିଛନ୍ତି ବିଶ୍ବବିଦ୍ୟାଳୟ କୁଳପତି ପ୍ରଫେସର ନଜମା ଅଖ୍ତର । ଏହି ସମୟରେ ସେମାନଙ୍କ ପରିବାର ଲୋକଙ୍କ ସହ ଆଲୋଚନା କରିବା ସହ ଚିକିତ୍ସା ପାଇଁ ସମସ୍ତ ଖର୍ଚ୍ଚ ବିଶ୍ବବିଦ୍ୟାଳୟ ପ୍ରଶାସନ ପ୍ରଦାନ କରିବ ବୋଲି ଆଶ୍ବାସନା ଦେଇଛନ୍ତି ।
ନାଗରିକତା ସଂଶୋଧନ ଆଇନକୁ ବିରୋଧ କରି ପ୍ରତିବାଦ ଓ ବିକ୍ଷୋଭ ପ୍ରଦର୍ଶନ କରିଥିଲେ ଜାମିୟାମିଲିଆ ଇସଲାମିଆ ବିଶ୍ବବିଦ୍ୟାଳୟର ଛାତ୍ରଛାତ୍ରୀ । ବିରୋଧ ପ୍ରଦର୍ଶନ ଉଗ୍ର ରୂପନେବା ସହ ପରିସ୍ଥିତି ଅଣାୟତ ହେବା ପରେ ପୋଲିସ ଗ୍ରହଣ କରିଥିଲା କାର୍ଯ୍ୟାନୁଷ୍ଠାନ । ଆଉ ସ୍ଥିତିରେ ସୁଧାର ଆଣିବା ପାଇଁ ପୋଲିସ ଲାଠି ଚାର୍ଜ କରିଥିଲା । ଫଳରେ କିଛି ଛାତ୍ର ଆହତ ହୋଇଥିଲେ ।
ଏହି ଘଟଣାରେ କୁଳପତି ପୋଲିସକୁ ଦାୟୀ କରିବା ସହ ଆହତ ଛାତ୍ରଙ୍କ ଏପରି ପରିସ୍ଥିତିରେ ବିଶ୍ବବିଦ୍ୟାଳୟ ସମ୍ପୂର୍ଣ୍ଣ ରୂପେ ସାଙ୍ଗରେ ରହିଥିବା ନେଇ ପରିବାର ସଦସ୍ୟଙ୍କୁ ଭରସା ଦେଇଛନ୍ତି । ସଫଦରଜଙ୍ଗ ଡ଼ାକ୍ତରଖାନାରେ ଆହତ ଛାତ୍ରଙ୍କ ଚିକିତ୍ସା ଜାରି ରହିଛି । ସେପଟେ ସମସ୍ତ ଖର୍ଚ୍ଚ ପ୍ରଶାସନ ବହନ କରିବ ବୋଲି କହିଛନ୍ତି କୁଳପତି ନଜମା ଅଖ୍ତର ।
