ନୂଆଦିଲ୍ଲୀ: ସିଏଏ ଓ ଏନଆରସି ବିରୁଦ୍ଧରେ ଜାମିୟା ମିଲ୍ଲିୟା ଇସଲାମିୟାର ଛାତ୍ର ମାନେ ଲଗାତାର ଭାବେ ବିରୋଧ ପ୍ରଦର୍ଶନ ଜାରି ରଖିଛନ୍ତି । ଏହି ପ୍ରରିପ୍ରେକ୍ଷୀରେ ଜାମିୟା କୋ-ଅର୍ଡିନେସନ କମିଟି ଡିସେମ୍ବର 27ରେ ନ୍ୟାସନାଲ ପ୍ରୋଟେଷ୍ଟ ଡେ ପାଳନ କରି ବିରୋଧ ମାର୍ଚ୍ଚ କରିବା ନେଇ ନିଷ୍ପତ୍ତି ନିଆଯାଇଛି । ଏନେଇ ସମିତି ସମସ୍ତ ଲୋକଙ୍କୁ ଏହିୁ ପ୍ରଦର୍ଶନରେ ସାମିଲ ହେବାନେଇ ଅପିଲ କରିଛି ।
ତେବେ ଏହି ବିରୋଧ ପ୍ରଦର୍ଶନ ଡିସେମ୍ବର 24 ଅର୍ଥାତ ମଙ୍ଗଳବାର 11 ଟା ସମୟରେ ମଣ୍ଡିହାଉସରୁ ଆରମ୍ଭ ହୋଇ ଗୃହମନ୍ତ୍ରୀ ଅମିତ ଶାହଙ୍କ ବାସଗୃହ କୃଷ୍ଣା ମେନନ ମାର୍ଗ ପର୍ଯ୍ୟନ୍ତ ଯିବ । ଏହି ପ୍ରଦର୍ଶନ ମାର୍ଚ୍ଚକୁ ନେଇ ଜାମିୟା କୋଅର୍ଡିନେସନ କମିଟି ସଦସ୍ୟ ଓ ଛାତ୍ର ମୀରାନ ହୈଦର କହିଛନ୍ତି ଯେ, ମୋଦି ସରକାରଙ୍କ ଦ୍ବାରା ଲାଗୁ କରାଯାଇଥିବା ଏଭଳି ଆଇନ ଦେଶର ଆତ୍ମା ଉପରେ ପ୍ରହାର ସଦୃଶ । ଯାହା ଯୁବପୀଢି କେବେବି ସହ୍ୟ କରିବେ ନାହିଁ । ସେ ଆହୁରି କହିଛନ୍ତି ଦେଶ ଗାନ୍ଧୀ ଓ ଆମ୍ବେଦକରଙ୍କ ନୀତିରେ ଚାଲୁଛି ଆଉ ଆଗକୁ ମଧ୍ୟ ଚାଲିବ। ଯଦି ଦେଶରେ ଏଭଳି କଳା ଆଇନ ଲାଗୁ କରିବାକୁ ଚେଷ୍ଟା କରିବ ତେବେ ଆମେ ତାର କଡା ବିରୋଧ କରିବୁ ।
ମୀରାନ ହୈଦରଙ୍କ କହିବାନୁଯାୟୀ, ପୋଲିସ ଦ୍ବାରା ଛାତ୍ର ଉପରେ କରାଯାଇଥିବା ବର୍ବରତା ଓ ସାମ୍ପ୍ରଦାୟିକ ରାଜନୀତି ବିରୋଧରେ ସେ ଗୃହମନ୍ତ୍ରୀଙ୍କ ଆବାସ ପର୍ଯ୍ୟନ୍ତ ଏହି ବିରୋଧ ମୋର୍ଚ୍ଚା କରିବା ପାଇଁ ନିଷ୍ପତ୍ତି କରିଛନ୍ତି । କିନ୍ତୁ ଏହି ମୋର୍ଚ୍ଚା ଶାନ୍ତିପୂର୍ଣ୍ଣ ରହିବ । ସମସ୍ତ ପ୍ରଦର୍ଶନକାରୀ ହାତ ଉପରକୁ କରି ମୁହଁରେ କଳା ପଟି ବାନ୍ଧି ମାର୍ଚ୍ଚ କରିବେ । ଏହାର ଉଦ୍ଦେଶ୍ୟ ହେଉଛି ସରକାରଙ୍କୁ ଜଣାଇବା ଯେ, ପୋଲିସର ମାଡକୁ ଡରି ଆମେ ପଛକୁ ହଟିବୁ ନାହିଁ । ଆଉ ଗାନ୍ଧୀଙ୍କ ଆଦର୍ଶରେ ଅନୁପ୍ରାଣିତ ହୋଇ ଏହି ଲଢେଇ ଜାରି ରଖିବୁ '।
