ନୂଆଦିଲ୍ଲୀ: 2017 ମସିହାରେ ଉତ୍ତର କୋରିଆ ଦ୍ବାରା କରାଯାଇଥିବା ପରମାଣୁ ପରୀକ୍ଷଣକୁ ନେଇ ଏକ ଅଧ୍ୟୟନ କରିଛି ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) । ଉତ୍ତର କୋରିଆ ଦ୍ବାରା କରାଯାଇଥିବା ଏହି ପରମାଣୁ ପରୀକ୍ଷଣ 1945 ରେ ଜାପାନର ହିରୋସୀମା ଉପରେ ପ୍ରୟୋଗ ହୋଇଥିବା ପରମାଣୁ ବୋମାଠାରୁ 17 ଗୁଣ ଅଧିକ ଘାତକ ଥିଲା ବୋଲି ଇସ୍ରୋ ବୈଜ୍ଞାନିକ କହିଛନ୍ତି । ହିରୋସୀମା ଉପରେ ପ୍ରୟୋଗ ହୋଇଥିବା ପରମାଣୁ ବୋମାର କ୍ଷମତା 15 କିଲୋଟନ ଥିବାବେଳେ ଏହାର କ୍ଷମତା 245 ରୁ 271 କିଲୋଟନ ଥିଲା ବୋଲି ଏହି ଗବେଷଣାରୁ ଜଣା ପଡିଛି ।
ଗୁଜୁରାଟର ଅହମଦାବାଦ ସ୍ଥିତ ମହାକାଶ ଉପଯୋଗ କେନ୍ଦ୍ରରେ ଇସ୍ରୋ ବୈଜ୍ଞାନିକ କେଏମ ଶ୍ରୀଜିତଙ୍କ ନେତୃତ୍ବରେ ଏହି ଗବେଷଣା କରାଯାଇଥିଲା । 2003 ରେ ଉତ୍ତର କୋରିଆ ପରମାଣୁ ଚୁକ୍ତିରୁ ଅଲଗା ହେବା ପରଠାରୁ ତାର ସମସ୍ତ ପରମାଣୁ ଗତିବିଧିକୁ ନେଇ ଏହି ଗବେଷଣା କରାଯାଇଛି । ଉତ୍ତର କୋରିଆର ଶାସକ କିମ ଜୋଙ୍ଗ ଉନ 5 ଥର ଭୂଗର୍ଭରୁ ପରମାଣୁ ପରୀକ୍ଷଣ କରିଥିଲେ । ଏହା ବ୍ୟତୀତ 2017 ସେପ୍ଟେମ୍ବର 3 ରେ ସମ୍ଭବତଃ ହାଇଡ୍ରୋଜେନ ବୋମା ପ୍ରସ୍ତୁତ କରିଥିଲେ ।
ସାଧାରଣତଃ ଭୁକମ୍ପ ମାପକ ଯନ୍ତ୍ର ବା ତାର ତଥ୍ୟ ଦ୍ବାରା ପରମାଣୁ ପରୀକ୍ଷଣର ଗବେଷଣା କରାଯାଇଥାଏ । କିନ୍ତୁ ଉତ୍ତର କୋରିଆର ଭୂକମ୍ପ ତଥ୍ୟ ଉବଲବ୍ଧ ନଥିବା ଯୋଗୁଁ ଇସ୍ରୋ ସେଟେଲାଇଟ ତଥ୍ୟରୁ ଏହି ଗବେଷଣା କରିଥିଲା । ଏହି ଗବେଷଣା ପାଇଁ ଇସ୍ରୋ ଜାପାନ ଉପଗ୍ରହ ଏଏଲଓଏସ-2 ଏବଂ ଇନଏସଏଆର ଟେକନୋଲୋଜିର ବ୍ୟବହାର କରିଥିଲା ।
