ନୂଆଦିଲ୍ଲୀ: ଭାରତୀୟ ନୌସେନାର INS ମଗର୍ ଯୁଦ୍ଧ ଜାହାଜ ମାଲଦ୍ବୀପର ରାଜଧାନୀ ମାଲେରୁ 200 ଜଣଙ୍କ ସହ କୋଚି ଅଭିମୁଖେ ଯାତ୍ରା କରିଛି। ଅନ୍ୟପକ୍ଷେ ପ୍ରଥମ ଯୁଦ୍ଧ ଜାହାଜ INS ଜଲାଶ୍ବା ରବିବାର ସକାଳେ 698 ଜଣଙ୍କୁ ନେଇ କୋଚିରେ ପହଞ୍ଚିଥିଲା ।
ଭାରତୀୟ ନୌସେନାର ମୁଖପାତ୍ର କମାଣ୍ଡର ବିବେକ ମଧୱାଲଙ୍କ ଅନୁଯାୟୀ, ପ୍ରବଳ ବର୍ଷା ଓ ଖରାପ ପାଗରେ ବି INS ମଗର୍ ରବିବାର ସନ୍ଧ୍ୟାରେ 202 ଜଣ ଭାରତୀୟଙ୍କୁ ନେଇ ମାଲେ ଛାଡିଛି । ଏହି ବ୍ୟାଚରେ 24 ଜଣ ମହିଳା ଓ 2 ଶିଶୁ ଅଛନ୍ତି । ଯୁଦ୍ଧ ଜାହାଜ ପହଞ୍ଚିବା ପୂର୍ବରୁ ସମସ୍ତ ଭାରତୀୟଙ୍କ ମେଡିକାଲ୍ ସ୍କ୍ରିନିଂ କରାଯାଇଥିଲା ଓ ସେମାନଙ୍କର ସମସ୍ତ ଜିନିଷକୁ ସାନିଟାଇଜ୍ କରାଯାଇଥିଲା।
ଶୁକ୍ରବାର ମାଲେ ଠାରୁ 698 ଜଣଙ୍କୁ ନେଇ INS ଜଲାଶ୍ବା ରବିବାର ସକାଳେ କୋଚିରେ ପହଞ୍ଚିଥିଲେ। ଏଠାରେ ସମସ୍ତ ଲୋକଙ୍କୁ 14 ଦିନ ପାଇଁ କ୍ବାରେଣ୍ଟାଇନ୍ କରାଯିବ । କୋରୋନା ନେଗେଟିଭ୍ ରିପୋର୍ଟ ଆସିବା ପରେ ସେମାନଙ୍କୁ ନିଜ ନିଜ ଘରକୁ ପଠାଯିବ ।
ଏହି ସମୟରେ ନୌସେନା ମିଶନ ସାଗର ଅଧୀନରେ ଥିବା INS କେସରୀକୁ ମାଲଦ୍ବୀପ, ମରିସସ୍, ସେଲେଲ୍ସ, ମେଦାଗାସ୍କର ଓ କୋମୋରୋସକୁ ମଧ୍ୟ ପଠାଇଛି । ଏହି ଯୁଦ୍ଧ ଜାହାଜରେ, HCQ ଟାବଲେଟ୍, ଔଷଧ ଓ ଖାଦ୍ୟ ସାମଗ୍ରୀ ମଧ୍ୟ ଅଛି । ଆୟୁର୍ବେଦ ଔଷଧ ସହ 600 ଟନ୍ ଖାଦ୍ୟ ସାମଗ୍ରୀ ମାଲଦ୍ବୀପକୁ ପଠାଯାଇଛି ।
କମାଣ୍ଡର ମଧୱାଲଙ୍କ କହିବାନୁସାରେ, ଭାରତ ମହାସାଗରର ସମସ୍ତ ବନ୍ଧୁତ୍ବପୂର୍ଣ୍ଣ ଦେଶମାନଙ୍କ ସହିତ ସମ୍ପର୍କକୁ ମଜଭୁତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ସାଗର’ (ସିକ୍ୟୁରିଟି ଆଣ୍ଡ ଗ୍ରୋଥ୍ ଫର ଅଲ୍ ଇନ୍ ରିଜନ୍) ପ୍ରକଳ୍ପ ଅଧୀନରେ ମିଶନ-ସାଗର ଆରମ୍ଭ କରାଯାଇଛି।
