ନୂଆଦିଲ୍ଲୀ: ଦେଶରେ ଦିନକୁ ଦିନ ବଢି ଚାଲିଛି କୋରୋନା ଆକ୍ରାନ୍ତଙ୍କ ସଂଖ୍ୟା । ଏଭଳି ଭୟଙ୍କର ପରିସ୍ଥିତିକୁ ଦୃଷ୍ଟିରେ ରଖି ଦେଶରେ 21ଦିନ ଲକଡାଉନ ଘୋଷଣା କରିଛନ୍ତି । ମାତ୍ର କୋରୋନା ଆକ୍ରାନ୍ତଙ୍କ ସଂଖ୍ୟା କମିବା ପରିବର୍ତ୍ତେ ବଢିବାରେ ଲାଗିଛି । ଏପଟେ ଲକଡାଉନ ପରଠାରୁ ଦେଶର ଅର୍ଥନୀତି ମାନ୍ଦାବସ୍ଥା ଦେଇ ଗତି କରୁଛି । ଯାହାକୁ ନେଇ ବହୁ ନେତା ମନ୍ତ୍ରୀ ସେମାନଙ୍କ ଗୋଟିଏ ମାସର ବେତନ ତ ଆଉ କିଏ ପ୍ରଧାନମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ଟଙ୍କା କୋରୋନା ସହାୟତା ଆକାରରେ ଦାନ କରୁଛନ୍ତି । ତେବେ ସୋମବାର ଭାରତୀୟ ରେଳୱେ କାର୍ଯ୍ୟକର୍ତ୍ତା ସେମାନଙ୍କ ଗୋଟିଏ ଦିନର ବେତନ ପ୍ରଧାନମନ୍ତ୍ରୀ ରିଲିଫ୍ ପାଣ୍ଠିକୁ ଦାନ କରିଛନ୍ତି ।
ତେବେ ଉତ୍ତର ସେଣ୍ଟ୍ରାଲ ରେଳୱେ କର୍ମଚାରୀ 7.3 କୋଟି ଟଙ୍କା ପ୍ରଧାନମନ୍ତ୍ରୀ ରିଲିଫ୍ ପାଣ୍ଠିକୁ ଦାନ କରିଛନ୍ତି । ଏଥିସହ ଉତ୍ତର ସେଣ୍ଟ୍ରାଲ ରେଳୱେ କର୍ମଚାରୀ 10 ହଜାର ମାସ୍କ ତିଆରି କରୁଥିବା ସୂଚନା ମିଳିଛି । ସେହିପରି ପ୍ରୟାଗରାଜ ସେଣ୍ଟ୍ରାଲ ହସ୍ପିଟାଲ ଦ୍ବାରା 2000 ଲିଟର ସାନିଟାଇଜର ତିଆରି ସରିଛି ।
ପ୍ରକାଶ ଥାଉକି, ମାରାତ୍ମକ କୋରୋନା କାରଣରୁ ଦେଶରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇ 1071ରେ ପହଞ୍ଚିଥିବା ବେଳେ 30 ଜଣ ପ୍ରାଣ ହରାଇ ସାରିଲେଣି ।
