ନୂଆଦିଲ୍ଲୀ: କେନ୍ଦ୍ରଶାସିତ ଅଞ୍ଚଳ ଲଦାଖରେ ଚୀନ ସେନାର ଗାଡି ପ୍ରବେଶ କରିଥିବା ନେଇ ଏକ ଭିଡିଓ ଭାଇରାଲ ହୋଇଥିଲା । ଭିଡିଓରେ ଚୀନ ସେନା ଲଦାଖରେ ପ୍ରବେଶ କରି ସ୍ଥାନୀୟ ଅଧିବାସୀଙ୍କୁ ଗାଳିଗୁଲଜ କରିବା ସହ ଫେରିଯାଇଥିବାର ଦାବି କରାଯାଇଥିଲା । ତେବେ ସୋମବାର ଏହି ଭିଡିଓର ସତ୍ୟତାକୁ ଖଣ୍ଡନ କରିଛନ୍ତି ଭାରତ ସରକାର ।
ସରକାରୀ ସୂଚନା ଅନୁଯାୟୀ ଏହି ଭିଡିଓଟି ପୁରୁଣା ଓ ସ୍ଥାନୀୟ ମାମଲା । ସରକାରୀ ସୂତ୍ରରୁ ଆସିଥିବା ବୟାନ ଅନୁଯାୟୀ ଭାଇରାଲ ହେଉଥିବା ଭିଡିଓଟି ପୁରଣା । ସ୍ଥାନୀୟ ପ୍ରଶାସନ ସହ ଏନେଇ ଆଲୋଚନା ହୋଇଛି । କୌଣସି ଚୀନ ସୈନ୍ୟ ଭାରତର କେନ୍ଦ୍ରଶାସିତ ଅଞ୍ଚଳ ଲଦାଖରେ ପ୍ରବେଶ କରି ନଥିବା ସ୍ପଷ୍ଟ କରିଛନ୍ତି ସରକାର ।
ଜଣେ ସରକାରୀ ଅଧିକାରୀଙ୍କ କହିବା ଅନୁଯାୟୀ, ଏହା ପ୍ରଥମ ଥର ନୁହେଁ । ଆଗରୁ ଅନେକ ଥର ଅନେକ ବର୍ଷରୁ ଏପରି ହୋଇଆସୁଛି । ବେଳେ ବେଳେ ସ୍ଥାନୀୟ ଅଧିବାସୀ ଏହି ଅଞ୍ଚଳରେ ବୁଲିବା ସହ ଗାଈଗୋରୁ ଚରାଉ ଚରାଉ ଅଜାଣତରେ ସୀମା ପାର ହୋଇଯାଇଥାନ୍ତି ।
5 ମିନିଟ 26 ସେକେଣ୍ଡର ଏହି ଭିଡିଓରେ ଚୀନର ଗାଡି ଭାରତୀୟ ସୀମା ମଧ୍ୟକୁ ପ୍ରବେଶ କରି କିଛି ସ୍ଥାନୀୟ ଲୋକଙ୍କ ସହ ଯୁକ୍ତିତର୍କ କରିବା ସହ ପୂନର୍ବାର ଫେରିଯାଉଥିବାର ଦେଖିବାକୁ ମିଳିଥିଲା । ଭିଡିଓରେ ଥିବା 2ଟି ଚୀନ ଗାଡି ଲଦାଖର ନିୟୋମା ବ୍ଲକର ଚଙ୍ଗଥାଙ୍ଗ ଅଞ୍ଚଳର ବୋଲି ଦାବି କରାଯାଇଥିଲା ।
