ନୂଆଦିଲ୍ଲୀ: ଲୋକସଭା ନିର୍ବାଚନର ପ୍ରଚାର ବେଳେ ନିଜ ବିରୋଧୀଙ୍କ ପାଇଁ ଆପତ୍ତିଜନକ ମନ୍ତବ୍ୟ ଦେବାର ଘଟଣା କିଛି ନୂଆ ନୁହେଁ । ପ୍ରଚାର ବେଳେ ନେତାଗଣ ଏପରି କିଛି ମନ୍ତବ୍ୟ ଦେଇ ବସନ୍ତି ଯାହା ସଭ୍ୟ ସମାଜ ପାଇଁ ଗ୍ରହଣୀୟ ହୋଇନଥାଏ । ଏଥର ଗାନ୍ଧୀ ପରିବାର ଜଣେ ସଦସ୍ୟ ନିଜ ବାପାଙ୍କ ନାଁ ନେଇ ଦମ୍ଭ ଦେଖାଇଛନ୍ତି । ମୁଁ ହେଉଛି ସଞ୍ଜୟ ଗାନ୍ଧୀଙ୍କ ପୁଅ । ଏପରି ଲୋକଙ୍କ ଠାରୁ ନିଜ ଜୋତା ଖୋଲାଇଥାଏ ବୋଲି କହିଛନ୍ତି ବିଜେପି ସାଂସଦ ବରୁଣ ଗାନ୍ଧୀ ।
ସୁଲତାନପୁରର ଏକ ନିର୍ବାଚନୀ ପ୍ରଚାର ବେଳେ ସ୍ବର୍ଗତଃ ସଞ୍ଜୟ ଗାନ୍ଧୀଙ୍କ ଏକମାତ୍ର ପୁଅ ବରୁଣ ଗାନ୍ଧୀ ବିରୋଧୀଙ୍କୁ ଟାର୍ଗେଟ କରି କହିଛନ୍ତି ଯେ, ଆପଣଙ୍କୁ କୌଣସି ଭୟଭୀତ ହେବାର ଆବଶ୍ୟକତା ନାହିଁ । କେବଳ ଭଗବାନଙ୍କ ଠାରୁ ଡରିବାର ଆବଶ୍ୟକତା ରହିଛି । ଏହି ଧରିତ୍ରୀରେ କୌଣସି 'ମାଇ କା ଲାଲ' ଆପଣଙ୍କର କିଛି କରିପାରିବେ ନାହିଁ । ନିଜ ପାପକୁ ନେଇ ମଣିଷକୁ ଡରିବାର ଆବଶ୍ୟକତା ରହିଛି, କୌଣସି ମନୁ-ଟୋନୁ ଠାରୁ ଡରିବାର ଆବଶ୍ୟକତା ନାହିଁ ବୋଲି ବରୁଣ କହିଛନ୍ତି ।
ସେ ଆହୁରି କହିଛନ୍ତି ଯେ, ମୁଁ ହେଉଛି ସଞ୍ଜୟ ଗାନ୍ଧୀଙ୍କ ପୁଅ । ମୁଁ ଏପରି ଲୋକଙ୍କୁ ନିଜ ଜୋତା ଖୋଲାଇଥାଏ । ମୁଁ ଏଠାରେ ଆପଣଙ୍କ ଗହଣରେ ଛିଡା ହୋଇଛି, କୌଣସି ମାଇ କା ଲାଲର ସାହସ ନାହିଁ ମୋର ସାମ୍ନାରେ ସ୍ବର ଉତ୍ତୋଳନ କରିବ । ବରୁଣ ହେଉଛନ୍ତି ସଞ୍ଜୟ ଓ ମେନକା ଗାନ୍ଧୀଙ୍କ ପୁଅ । ସେ ସୁଲତାନପୁରରୁ ସାଂସଦ ଅଛନ୍ତି । ଚଳିତ ନିର୍ବାଚନରେ ସେ ପିଲିଭିତରୁ ନିର୍ବାଚନ ଲଢୁଛନ୍ତି ।
