ନୂଆଦିଲ୍ଲୀ: କୃଷି ଆଇନକୁ ନେଇ କେନ୍ଦ୍ର ସରକାରଙ୍କ ଉପରେ ଅସନ୍ତୋଷ ପ୍ରକାଶ କଲେ ସୁପ୍ରିମକୋର୍ଟ । କୃଷି ଆଇନ ଓ ଚାଷୀ ଆନ୍ଦୋଳନକୁ ନେଇ ଆବେଦନ ଯାଚିକାର ଶୁଣାଣି କରି ଅସନ୍ତୁଷ୍ଟ ଜାହିର କରିଛନ୍ତି । କି ପ୍ରକାର ବୁଝାମଣା ହେଉଛି ବୋଲି ପ୍ରଶ୍ନ କରିଛନ୍ତି ସୁପ୍ରିମକୋର୍ଟ । ଯାହା କିଛି ଚାଲିଛି ଆମେ ସେଥିରୁ ଖୁସି ନାହୁଁ । ଗତଥର ମଧ୍ୟ ସରକାର ବୁଝାମଣାରେ ଏହାକୁ ସମାପ୍ତ କରିବେ କହିଥିଲେ, ହେଲେ ଆଜି ପର୍ଯ୍ୟନ୍ତ ଏହାର ନିଷ୍କର୍ସ ବାହାରି ପାରିଲା ନାହିଁ ବୋଲି ସମାଲୋଚନା କରିଛନ୍ତି ମୁଖ୍ୟ ବିଚାରପତି ଜଷ୍ଟିସ ଏସଏ ବୋବଡେ ।
ସୁପ୍ରିମକୋର୍ଟ କେନ୍ଦ୍ର ସରକାରକୁ ଭର୍ସନା କରିବା ସହ ଆଇନକୁ ସ୍ଥଗିତ ରଖିବାକୁ କହିଛନ୍ତି । ଯଦି ସରକାର ସ୍ଥଗିତ ନ ରଖନ୍ତି ତେବେ ଏଥିରେ ସୁପ୍ରିମକୋର୍ଟ ହସ୍ତକ୍ଷେପ କରିବେ । କିଛି ଲୋକେ ଆତ୍ମହତ୍ୟା କରୁଛନ୍ତି । କାହିଁକି ଥଣ୍ଡା କାକରରେ ବୟସ୍କ ଓ ମହିଳାମାନେ ଧାରଣରେ ବସୁଛନ୍ତି । ଏବଂ କାହିଁକି କେହି ଜଣେ ଏହି ଆଇନ ସପକ୍ଷରେ ଆବେଦନ କରୁନାହିଁନ୍ତି । ତେବେ କୌଣସି ରକ୍ତପାତ କିମ୍ବା ମୃତ୍ୟୁକୁ ଗ୍ରହଣ କରାଯିବ ନାହିଁ ବୋଲି ଜଷ୍ଟିସ ଏସଏସ ବୋବେଡଙ୍କ ତିନି ଜଣିଆ ଖଣ୍ଡପୀଠ ଆଜି ଶୁଣାଣିରେ କହିଛନ୍ତି । ମୁଖ୍ୟ ବିଚାରପତି କହିଛନ୍ତି ଯେ, ଆମେ ଆଶଙ୍କା କରୁଛୁ ଯେ ଦିନେ ଆନ୍ଦୋଳନ ସ୍ଥାନରେ ହିଂସା ସୃଷ୍ଟି ହୋଇପାରେ ।
ତେଣୁ ଆଇନକୁ ସ୍ଥଗିତ ରଖାଯାଇ ଏକ କମିଟି ଗଠନ କରାଯାଉ । ଏକ୍ସପର୍ଟ କମିଟିର ନିଷ୍ପତ୍ତି ପର୍ଯ୍ୟନ୍ତ ଆଇନ କାର୍ଯ୍ୟକାରୀ ନ କରାଯାଉ । ସରକାର ଆଇନ ସ୍ଥଗିତ ନ କଲେ ଏନେଇ କୋର୍ଟ ନିଜ ଆଡୁ ନିର୍ଦ୍ଦେଶ ପାସ କରିବ । କମିଟି ପାଖରେ ନିଜର ଅଭିଯୋଗ ରଖିବାକୁ ଚାଷୀମାନଙ୍କୁ ଅନୁମତି ଦେଇଛନ୍ତି । କମିଟି ରିପୋର୍ଟ ଦେବା ପରେ ନିଷ୍ପତ୍ତି ଶୁଣାଇବେ କୋର୍ଟ ।
ସୂଚନାଯୋଗ୍ୟ, ଦିଲ୍ଲୀ ସୀମାରେ ତିନି କୃଷି ଆଇନକୁ ବିରୋଧ କରି 48 ଦିନ ଧରି ଚାଷୀ ଆନ୍ଦୋଳନରେ ବସିଛନ୍ତି । ଚାଷୀ ଆନ୍ଦୋଳନ ଏବଂ କୃଷି ଆଇନ ସହିତ ଜଡିତ ସମସ୍ତ ମାମଲାରେ ଆଜି ସୁପ୍ରିମକୋର୍ଟରେ ଶୁଣାଣି ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
