ହାଇଦ୍ରାବାଦ: ଦିଶା ଗଣଦୁଷ୍କର୍ମ ଓ ହତ୍ୟା ଘଟଣାର 4 ଅଭିଯୁକ୍ତ ଏନକାଉଣ୍ଟରରେ ମରିବା ପରେ ସେମାନଙ୍କ ପରିବାରବର୍ଗ ଦୁଃଖରେ ଭାଙ୍ଗି ପଡିଛନ୍ତି । ଏନକାଉଣ୍ଟରକୁ ନେଇ ପରିବାର ପକ୍ଷରୁ ପ୍ରତିକ୍ରିୟା ପ୍ରକାଶ ପାଇଛି । ମୁଖ୍ୟ ଅଭିଯୁକ୍ତ ମହମ୍ମଦ ଆରିଫର ମା' କହିଛନ୍ତି ଯେ, ତାଙ୍କ ପୁଅ ଚାଲିଯାଇଛି । ପୂର୍ବରୁ ଆରିଫ୍ର ବାପା କହିଥିଲେ ଯେ, ଯଦି ତାଙ୍କ ପୁଅ ଅପରାଧ କରିଛି ତେବେ ତାକୁ କଠୋର ଦଣ୍ଡ ମିଳିବା ଦରକାର ।
ଅନ୍ୟପଟେ ଏନକାଉଣ୍ଟରେ ମୃତ୍ୟୁ ହୋଇଥିବା ଅନ୍ୟଜଣେ ଅଭିଯୁକ୍ତ ଚେନ୍ନାକେଶାବୁଲୁର ପତ୍ନୀ କହିଛି ଯେ, ଯେଉଁଠି ମୋ ସ୍ବାମୀଙ୍କୁ ମାରି ଦିଆଯାଇଛି । ମୋତେ ମଧ୍ୟ ସେହି ସ୍ଥାନକୁ ନେଇ ମାରି ଦିଆଯାଉ । ସ୍ବାମୀ ଯିବା ପରେ ମୋ ପାଖରେ କରିବାକୁ କିଛି ବି ନାହିଁ । ସେ ଏହା ମଧ୍ୟ କହିଛି, ତାକୁ ଭରସା ଦିଆଯାଇଥିଲା ତା' ସ୍ବାମୀର କିଛି ହେବନାହିଁ ଏବଂ ସେ ଶୀଘ୍ର ଫେରି ଆସିବେ । ହେଲେ ତାଙ୍କ ମୃତ୍ୟୁ ପରେ ମୁଁ କଣ କରିବି ମୁଁ ନିଜେ ଜାଣିପାରୁନାହିଁ । ସୂଚନାଯୋଗ୍ୟ, ନିକଟରେ ହିଁ ଚେନ୍ନାକେଶାବୁଲୁର ବିବାହ ହୋଇଥିଲା ।
ସେହିପରି ଅଭିଯୁକ୍ତ ଶିବାର ବାପା କହିଛନ୍ତି ଯେ, ହୋଇପାରେ ମୋ ପୁଅ ଅପରାଧ କରିଥାଇପାରେ ହେଲେ ତାର ଏମିତି ଅନ୍ତ ହେବାର ନଥିଲା । ଅନେକ ଲୋକ ଭୁଲ କରୁଛନ୍ତି କିନ୍ତୁ କାହାକୁ ଏମିତି ହତ୍ୟା କରାଯାଇନାହିଁ । ତେବେ ସ୍ଥାନୀୟ ଲୋକଙ୍କ କହିବାନୁସାରେ, ଏନକାଉଣ୍ଟରେ ମୃତ 4 ଅଭିଯୁକ୍ତ ଗରିବ ଶ୍ରେଣୀର ଥିଲେ ଏବଂ ଶିକ୍ଷାଗତ ଯୋଗ୍ୟତା ମଧ୍ୟ ସେମାନଙ୍କର ବହୁତ କମ୍ ଥିଲା । ତଥାପି ଭଲ ରୋଜଗାର କରି ବିଳାସମୟ ଜୀବନ ଅତିବାହିତ କରୁଥିଲେ ।
ତେଲେଙ୍ଗାନାର ନାରାୟଣପେଟ ଜିଲ୍ଲାର ଜାକଲେର ନିବାସୀ 26 ବର୍ଷୀୟ ଆରିଫ ଟ୍ରକ ଡ୍ରାଇଭର ହେବା ପୂର୍ବରୁ ପେଟ୍ରୋଲ ପମ୍ପରେ କାମ କରୁଥିଲା । ସେହିପରି 20 ବର୍ଷୀୟ ଜୋଲ୍ଲୁ ଶିବା ଓ ଜୋଲ୍ଲୁ ନବୀନ ସେହି ଜିଲ୍ଲାର ଗୁଡିଗଡାଲ ଗାଁର ଥିଲେ । ଉଭୟ କ୍ଲିନର ଭାବେ କାମ କରୁଥିଲା । ଅନ୍ୟଜଣେ 20 ବର୍ଷୀୟ ଚେନ୍ନାକେଶାବୁଲୁ ମଧ୍ୟ ଟ୍ରକ ଚାଳକ ଥିଲା । ସେ ମଧ୍ୟ ଗୁଡିଗାନ୍ଦଲା ଗାଁର ଥିଲା ।
