ନୂଆଦିଲ୍ଲୀ: ପାକିସ୍ତାନ ଘରେ ପଶି ଭାରତୀୟ ବାୟୁସେନା ବାଲାକୋଟରେ ଏୟାର ଷ୍ଟ୍ରାଇକ କରିଥିଲା । ଏହି ଷ୍ଟ୍ରାଇକ ପରେ ପାକିସ୍ତାନ ମଧ୍ୟ ଅନୁରୂପ ଭାବେ ଭାରତରେ ପଶି ଭାରତର ସାମରିକ ଆଡ୍ଡା ଉପରେ ଏୟାର ଷ୍ଟ୍ରାଇକ ଲଞ୍ଚ କରିବାକୁ ଉଦ୍ୟମ କରିଥିଲା । ତେବେ ସତର୍କ ଏବଂ ସର୍ବଦା ସଜାଗ ଭାରତୀୟ ବାୟୁ ସେନା ପାଇଁ ପଡୋଶୀ ପାକର ଏହି ହୀନ ଯୋଜନା ପଣ୍ଡ ହୋଇଥିଲା ।
ଖବର ସରବରାହ ସଂସ୍ଥା ଏଏନଆଇର ଏକ ରିପୋର୍ଟରେ ପ୍ରକାଶ ପାଇଛି କାହିଁକି ଭାରତରେ ଟାର୍ଗେଟ ହିଟ କରିପାରିଲା ନାହିଁ ପାକିସ୍ତାନ । ଭାରତୀୟ ବାୟୁ ସେନା ପାକିସ୍ତାନ ବାଲାକୋଟ ସ୍ଥିତ ଜେଇଏମ ଆଡ୍ଡା ଉପରେ ଏୟାର ଷ୍ଟ୍ରାଇକ କରିଥିଲା । ଏହାର ଗୋଟିଏ ଦିନ ପରେ ଅର୍ଥାତ୍ ଫେବୃଆରୀ 27 ତାରିଖରେ ପାକିସ୍ତାନ ବାୟୁସେନା ଆମେରିକା ନିର୍ମିତ ଏଫ୍-16, ଫ୍ରାନ୍ସ ନିର୍ମିତ ମିରାଜ-3 ଏବଂ ଚୀନ-ପାକିସ୍ତାନ ନିର୍ମିତ ଜେଏଫ୍-17 ଲଢୁଆ ବିମାନ ସାହାଯ୍ୟରେ ଭାରତ ଉପରେ ଆକ୍ରମଣ ପାଇଁ ଉଦ୍ୟମ କରିଥିଲା । 20ଟି ଯୁଦ୍ଧ ବିମାନ ସାହାଯ୍ୟରେ ପାକ୍ ଭାରତ ଉପରେ ଆକ୍ରମଣ ପାଇଁ ପ୍ରୟାସ କରିଥିଲା । ଏହା ସହିତ ପାକିସ୍ତାନ ବାୟୁସେନା 11ଟି ଏଚ-4 (ଏକ ହଜାର କେଜି)ର ବୋମା ମାଡ କରିଥିଲା ।
ତେବେ ପାକିସ୍ତାନ ଟାର୍ଗେଟ ହିଟ କରିବାରେ ଅସଫଳ ହୋଇଥିଲା । ଭାରତୀୟ ସୀମାର 50 କିମି ଦୂରତା ଭିତରକୁ ସମସ୍ତ ବୋମା ମାଡ କରିଥିଲା ପାକିସ୍ତାନ । ଏଚ-4 ବୋମାକୁ ମିରଜ-3 ମାଡ କରିଥିଲା । ଏଚ-4 ବୋମାକୁ ପାକିସ୍ତାନ ଏବଂ ଦକ୍ଷିଣ ଆଫ୍ରିକା ମିଳିତ ଉଦ୍ୟମରେ ନିର୍ମାଣ କରିଛନ୍ତି । ତେବେ ଏହି ବୋମା ଟାର୍ଗେଟ ହିଟ କରିନଥିଲା । ଜମ୍ମୁ କାଶ୍ମୀର ସ୍ଥିତ ସେନା ଘାଟି ଉପରେ ଏହି ବୋମା ଆକ୍ରମଣ ହୋଇଥିଲା କିନ୍ତୁ ବୋମାଟି ଏକ ଗଛ ଉପରେ ପଡିଥିଲା । ଫଳରେ ସେନା ଘାଟିର କୌଣସି କ୍ଷତି ଘଟିନାହିଁ ।ଏହି ସମୟରେ ଘାଟିରେ ଏକାଧିକ ବରିଷ୍ଠ ପ୍ରତିରକ୍ଷା ଅଧିକାରୀ ଉପସ୍ଥିତ ଥିଲେ । ବୋମା ପୁଞ୍ଚ ଏହାର ସଂଲଗ୍ନ ଅଞ୍ଚଳରେ ପଡିଥିଲା କିନ୍ତୁ ସେଭଳି କିଛି ବିଶେଷ କ୍ଷୟ କ୍ଷତି ଘଟିନାହିଁ ।
ତେବେ ସଜାଗ ଭାରତୀୟ ବାୟୁସେନା ପାଇଁ ପାକିସ୍ତାନର ସମସ୍ତ ଦୁଃସାହସ ଏବଂ ହୀନ ପ୍ରୟାସ ପଣ୍ଡ ହୋଇଥିଲା । ପାକିସ୍ତାନର ଆକ୍ରମଣକୁ ମୁକାବିଲା କରିବାକୁ ଭାରତୀୟ ବାୟୁ ସେନାର ଫାଇଟର ଜେଟ ସୀମାରେ ପଇନ୍ତରା ମାରିବା ସହିତ ସର୍ବାଧିକ ଦୃତ ଗତିରେ ଉଡାଣ ଭରୁଥିଲେ । ଫଳରେ ପାକିସ୍ତାନର ଲଢୁଆ ବିମାନ ଟାର୍ଗେଟକୁ ହିଟ କରିବାରେ ଅସଫଳ ହୋଇଥିଲା । ପାକିସ୍ତାନ ମିରାଜ-3ରୁ ବୋମା ମାଡ କରିଥିବା ବେଳେ ଆକାଶରୁ ଆକାଶ ମିସାଇଲ ଲଞ୍ଚ କିରବା ପାଇଁ ଏଫ୍-16କୁ ମୁତୟନ କରିଥିଲା । ଫଳରେ ମିରାଜ-21 ଉଡାଉଥିବା ଓ୍ବିଙ୍ଗ କମାଣ୍ଡର ଅଭିନନ୍ଦନ ବର୍ତ୍ତମାନ ଆର-73 ମିସାଇଲ ମାଡ କରି ଗୋଟିଏ ଏଫ୍-16କୁ ଖସାଇ ଦେଇଥିଲେ ।
ଏହା ସହିତ ରିପୋର୍ଟ ମୁତାବକ, ଭାରତ ବାୟୁ ସୀମାର ପ୍ରତିରକ୍ଷା ପାଇଁ ସୁଖୋଇକୁ ମୁତୟନ କରିଥିଲା । ପାକ୍ ଏଫ୍-16ର ଆମରାମ୍ ମାସାଇଲ ମାଡକୁ ପ୍ରତିହତ କରିବାକୁ ଭାରତ ଏହି ଯୋଜନା କରିଥିଲା । ତେବେ ଭାରତୀୟ ବାୟୁ ସେନାର ସଜାଗ ପାଇଁ ପାକିସ୍ତାନ ଟାର୍ଗେଟ ହିଟ୍ କରିବାରେ ଅସଫଳ ହୋଇଥିଲା ।
