ନୂଆଦିଲ୍ଲୀ: ଥମୁନି ଭାରତ-ଚୀନ ସୀମା ବିବାଦ । ଦୀର୍ଘ 6 ମାସରୁ ଉର୍ଦ୍ଧ୍ବ ସମୟ ଅପ୍ରୀତିକର ପରିସ୍ଥିତି ବଳବତ୍ତର ରହିଛି । ଏହା ଭିତରେ ସେନା ମୁଖ୍ୟ ଜେନେରାଲ ଏମ ନରୱଣେ ଭାରତ ଓ ଚୀନ ସହ କୁଟନୈତିକ ସ୍ତରରେ ଆଲୋଚନା କରି ସମାଧାନ କଥା କହିଛନ୍ତି । ଏହା ପରେ ବି ଚୀନ ପଟୁ ଭାରତ ସହ କୌଣସି ଯୁଦ୍ଧ ପରିସ୍ଥିତି ବା ଆକ୍ରମଣ ହୋଇପାରେ ବୋଲି ନରୱଣେ ଆଶଙ୍କା କରିଛନ୍ତି । ଚୀନ୍ର ବରିଷ୍ଠ କମାଣ୍ଡୋମାନେ ପୂର୍ବ ଲଦାଖରେ ଉତ୍ତେଜନା ବୃଦ୍ଧି ପାଇଁ ଲୁହା ରଡରେ ଆକ୍ରମଣ କରିବା ପାଇଁ ଆଲୋଚନା କରୁଛନ୍ତି ବୋଲି ସୂଚନା ମିଳିଛି ।
ଏହାପରେ ବି ସେ କହିଛନ୍ତି ଯେ ଆମେ ଏକ ଚୁକ୍ତିନାମାରେ ପହଞ୍ଚିବା ପାଇଁ ଆଶାବାଦୀ । ଯାହା ପାରସ୍ପରିକ ଗ୍ରହଣୀୟ ଏବଂ ଅତ୍ୟଧିକ ନୀତିଗତ ନିର୍ଦ୍ଦେଶାବଳୀ ଅନୁଯାୟୀ ପ୍ରକୃତରେ ଲାଭଦାୟକ ଅଟେ । ସେନା ମୁଖ୍ୟ ଏହା ମଧ୍ୟ କହିଛନ୍ତି ଯେ ପୂର୍ବ ଲଦାଖରେ ସ୍ଥିତି ଏବେ ସ୍ଥିର ରହିଛି । ପ୍ରତିରକ୍ଷା ଏବଂ ସାମରିକ ପ୍ରସଙ୍ଗ ଉପରେ ଏକ ପୋର୍ଟାଲ Bharatshakti.in ଦ୍ବାରା ଆୟୋଜିତ ଏକ କନକ୍ଲେଭରେ ଜେନେରାଲ ନରୱଣେ ଏହା କହିଛନ୍ତି । ଅଧିକ ଉଚ୍ଚତା ବିଶିଷ୍ଟ ଅଞ୍ଚଳରେ ନିୟୋଜିତ ଭାରତୀୟ ସୌନ୍ୟଙ୍କୁ ସମସ୍ତ ପୋଷାକ ଏବଂ ଅସ୍ତ୍ରଶସ୍ତ୍ର ଦିଆଯାଇଛି ।
ପୂର୍ବ ଲଦାଖରେ ଦୀର୍ଘ ଦିନ ଧରି ଚାଲିଆସୁଥିବା ଅସନ୍ତୋଷ ପ୍ରକ୍ରିୟାରେ ସମ୍ଭାବ୍ୟ ସଫଳତା ପାଇଁ ନିର୍ଦ୍ଦିଷ୍ଟ ପ୍ରସ୍ତାବ ଉପରେ ଆଲୋଚନା ପାଇଁ ଭାରତ ଏବଂ ଚୀନ୍ ଆଉ ଏକ ରାଉଣ୍ଡ ସାମରିକ ଆଲୋଚନା କରିବାର ସମ୍ଭାବନା ରହିଛି । ଶୁକ୍ରବାର ଅଷ୍ଟମ ରାଉଣ୍ଡ କର୍ପସ କମାଣ୍ଡର ସ୍ତରୀୟ ଆଲୋଚନାରେ ବିଭିନ୍ନ ବିଷୟରେ ଆଲୋଚନା କରାଯାଇଛି ।
ଶୁକ୍ରବାର ପୂର୍ବରୁ ପ୍ରକାଶିତ ମିଳିତ ବିବୃତ୍ତିରେ ଭାରତୀୟ ସେନା ଏବଂ ଚୀନ୍ ପିପୁଲ୍ସ ଲିବରେସନ୍ ଆର୍ମି (ପିଏଲ୍ଏ) ଏହି ଆଲୋଚନାକୁ ଖୋଲା, ଗଭୀର ଏବଂ ଗଠନମୂଳକ ବୋଲି ବର୍ଣ୍ଣନା କରିଛନ୍ତି । ଏହି ବିବୃତ୍ତିରେ କୁହାଯାଇଛି ଯେ ଦୁଇ ଦେଶର ନେତାଙ୍କ ଦ୍ବାରା ମିଳିଥିବା ଗୁରୁତ୍ବପୂର୍ଣ୍ଣ ସହମତିକୁ ଆନ୍ତରିକତାର ସହ କାର୍ଯ୍ୟକାରୀ କରିବା ଏବଂ ଫ୍ରଣ୍ଟଲାଇନ ସୌନ୍ୟମାନେ ସଂଯମତା ଅବଲମ୍ବନ କରିବା ଏବଂ ଭୁଲ ବୁଝାମଣାକୁ ଏଡାଇବା ପାଇଁ ସହମତ ହୋଇଛି । ତେବେ ଭାରତ ପକ୍ଷରୁ 50 ହଜାର ସୈନ୍ୟ ପୂର୍ବ ଲଦାଖର ବିଭିନ୍ନ ଉଚ୍ଚତମ ସ୍ଥାନରେ ନିଯୁକ୍ତ କରାଯାଇଛି ।
