ଲକ୍ଷ୍ନୌ : କେଉଁଠି ଜାତିଧର୍ମ ପାଇଁ ଜଣେ ନେଉଛି ଅନ୍ୟ ଜଣଙ୍କର ଜୀବନ ତ ଅନ୍ୟ କେଉଁଠି ଦେଖାଦେଇଛି ଭାଇଭାଇ ଭିତରେ ଭଲପାଇବା । ଉତ୍ତରପ୍ରଦେଶ ଛପ୍ରାଉଲା ଗାଁରେ ଦେଖିବାକୁ ମିଳିଛି ଏକ ଅଜବ ଦୃଶ୍ୟ । ଏବେ ରମଜାନ ମାସ ଚାଲୁଥିବାରୁ ମୁସଲିମ ସମ୍ପ୍ରଦାୟର ଲୋକେ ରଖିଥାନ୍ତି ରୋଜା । ଆଉ ରୋଜା ଭାଙ୍ଗିବା ପାଇଁ ରଖାଯାଏ ଇଫତାର । ତେବେ ସେହି ଅଞ୍ଚଳର ରାମବୀର ସିଂ ନାମକ ଜଣେ ବ୍ୟକ୍ତି ସେମାନଙ୍କ ଏହି କାର୍ଯ୍ୟକ୍ରମକୁ ହୋଷ୍ଟ କରିଛନ୍ତି ।
ରାମବୀରଙ୍କ ଧର୍ମ ହିନ୍ଦୁ । ସେ ଟାଟା ମୋଟର୍ସରେ କାମ କରନ୍ତି । ହେଲେ ସେ ଜାତିଧର୍ମ ନଦେଖି ଏହି ମୁସଲମାନ ଭାଇଙ୍କୁ ସହାୟତା କରିବା ପାଇଁ ଆଗେଇ ଆସିଛନ୍ତି । ଆଉ ସମାଜକୁ ଶାନ୍ତିର ସହ ବଞ୍ଚିବା ପାଇଁ ବାର୍ତ୍ତା ଦେଇଛନ୍ତି । ଶୁକ୍ରବାର ସୂର୍ଯ୍ୟାସ୍ତ ପୂର୍ବରୁ ଉଭୟ ହିନ୍ଦୁ ଏବଂ ମୁସଲମାନ ସଂପ୍ରଦାୟର ଲୋକେ ବସି ଏକାଠି ରାମବୀରଙ୍କ କାର୍ଯ୍ୟାଳୟରେ ଇଫତାର ଖାଇଥିଲେ । ଏହାପରେ ନମାଜ ପଢି ରୋଜା ଖୋଲିଥିଲେ ।
ହିନ୍ଦୁ ମୁସଲମାନ ଭିତରେ କୌଣସି ଭିନ୍ନତା ନ ଦେଖିବା ସହ ଏକାଠି ଭାଇଚାରାରେ ବାନ୍ଧି ହୋଇ ରହିବା ପାଇଁ ମୁଁ ଏହି କାର୍ଯ୍ୟକ୍ରମର ଆୟୋଜନ କରିଥିଲି ବୋଲି କୁହନ୍ତି ରାମବୀର ସିଂ।
