ହାଇଦ୍ରାବାଦ: କୋରୋନା ସଂକ୍ରମଣର ପ୍ରକାର ଭେଦକୁ ନେଇ ଚାଲିଛି ନାନା କଳ୍ପନା ଜଳ୍ପନା । ଏମିତିରେ ନ୍ୟୁୟର୍କ ସିଟିର ହସ୍ପିଟାଲ ନେଟୱାର୍କ ମାଇଣ୍ଟ ସିନାଇରେ ହୋଇଥିବା ସଦ୍ୟତମ ଗବେଷଣାରୁ ଜଣା ପଡିଛି କି କୋରୋନା ଆକ୍ରାନ୍ତଙ୍କ ଶରୀରରେ ହୃଦ ସଂକ୍ରମଣ(ମାଇଓକାର୍ଡିଆଲ ଇନଜ୍ୟୁରି) ହୋଇଥାଏ । ସମସ୍ତେ ଏହା ଦ୍ବାରା ପ୍ରଭାବିତ ନହେଲେ ବି ଅନେକ ସମ୍ଭାବ୍ୟ ହୃଦରୋଗୀମାନେ କୋରୋନା ସଂକ୍ରମଣ ଦ୍ବାରା ହୃଦ ସଂକ୍ରମଣର ଶିକାର ହୋଇଥାଆନ୍ତି । ତେବେ ଏହି ଆକ୍ରାନ୍ତମାନଙ୍କ ମୃତ୍ୟୁ ଆଶଙ୍କା ସର୍ବାଧିକ ବୋଲି ରିପୋର୍ଟରେ ପ୍ରକାଶ ପାଇଛି ।
ଏନେଇ ଜୁନ 5ରେ ଆମେରିକାନ କଲେଜ ଅଫ କାର୍ଡିଓଲୋଜି ଜର୍ଣ୍ଣାଲରେ ଏକ ବିସ୍ତୃତ ବିବରଣୀ ପ୍ରକାଶ ପାଇଥିଲା । ଯେଉଁଥିରେ ଲେଖା ରହିଛି କି କୋରୋନା ସଂକ୍ରମଣର ରକ୍ତ କୋଷିକା ଓ ହୃତପିଣ୍ଡ ଉପରେ ଅନେକ ପ୍ରଭାବ ରହିଥିବା ସ୍ପଷ୍ଟ ହୋଇସାରିଛି । ଏହି ତଥ୍ୟ ଆଧାରରେ ଦେଖାଯାଇଥିଲା କି ଡାକ୍ତରଖାନାରେ ଭର୍ତ୍ତି ହୋଇଥିବା କୋରୋନା ସଂକ୍ରମିତଙ୍କ ମଧ୍ୟରୁ 36 ପ୍ରତିଶତ ଆକ୍ରାନ୍ତଙ୍କ ଶରୀରରେ ହୃଦପିଣ୍ଡ ସଂକ୍ରମିତ ହୋଇଥାଏ । ଫଳରେ ସେମାନଙ୍କ ମୃତ୍ୟୁର ଆଶଙ୍କା ସର୍ବାଧିକ ରହିଥାଏ । ଏନେଇ ମାଉଣ୍ଟ ସିନାଇ କଲେଜର ମେଡିସିନ୍ସରେ ଆସିଷ୍ଟାଣ୍ଟ ପ୍ରୋଫେସର ଅନୁ ଲାଲା ସୂଚନା ଦେଇଛନ୍ତି ।
ଅନୁ ଏହା ସ୍ପଷ୍ଟ କରିଛନ୍ତି କି ଚୀନ ଓ ୟୁରୋପରୁ ହୋଇଥିବା ଅନୁଧ୍ୟାନରୁ ଏହି ରିପୋର୍ଟ ହସ୍ତଗତ ହୋଇଛି । ଏହି ତଥ୍ୟ ସମସ୍ତ ସ୍ବାସ୍ଥ୍ୟକର୍ମୀ ଓ ଡାକ୍ତରଙ୍କ ପାଇଁ ଅତି ଜରୁରୀ । କାରଣ ଯଦି କୌଣସି କୋରୋନା ଆକ୍ରାନ୍ତ ଏନୃମର୍ଜେନ୍ସି ୱାର୍ଡରେ ଭର୍ତ୍ତି ହୁଅନ୍ତି ଓ ତାଙ୍କ ଶରୀରରେ ଟ୍ରୋପୋନିନସ୍ତରରେ ପରିବର୍ତ୍ତନ ହୋଇ ସେମାନେ ହୃଦପିଣ୍ଡ ସଂକ୍ରମିତ ହୁଅନ୍ତି । ତେବେ ଡାକ୍ତରମାନେ ତାଙ୍କୁ ତୁରନ୍ତ ବିଶେଷ ନଜର ଦେବା ଦରକାର ।
ଏହି ତଥ୍ୟ ପାଇବା ପାଇଁ ନ୍ୟୁୟର୍କର ମାଉଣ୍ଟ ସିନାଇ ହସ୍ପିଟାଲ ନେଟୱାର୍କରେ ଫେବୃଆରୀ ଶେଷ ସପ୍ତାହରୁ ଏପ୍ରିଲ ଦ୍ବିତୀୟ ସପ୍ତାହ ଯାଏଁ ଭର୍ତ୍ତି ହୋଇଥିବା ପ୍ରାୟ 3000 ଯୁବ ଆକ୍ରାନ୍ତଙ୍କ ଇଲେକ୍ଟ୍ରୋନିକ୍ସ ସ୍ବାସ୍ଥ୍ୟ ନିରୀକ୍ଷଣ କରାଯାଇଥିଲା । ଏମାନଙ୍କ ମଧ୍ୟରୁ 36 ପ୍ରତିଶତ ଆକ୍ରାନ୍ତଙ୍କ ଶରୀରରେ ହୃତ୍ ସଂକ୍ରମଣ ହୋଇଥିବା ଦେଖାଯାଇଥିଲା । ଯେଉଁମାନଙ୍କ ମୃତ୍ୟୁ ଆଶଙ୍କା ଅନ୍ୟଙ୍କ ତୁଳନା 3 ଗୁଣା ଅଧିକା ଥିବା ଦେଖାଯାଇଥିଲା ।
ଏହା ଏକ ଚିନ୍ତା ଜନକ ବିଷୟ ହୋଇଥିବାରୁ ଗବେଷକମାନେ ତୁରନ୍ତ ଆକ୍ରାନ୍ତଙ୍କ ଟ୍ରୋପୋନିନ ସ୍ତର ଉପରେ ଗବେଷଣା ଆରମ୍ଭ କରିଥିଲେ । ସେମାନେ ଏହି ଗବେଷଣାରେ ହୃତ ସଂକ୍ରମଣ ଦ୍ବାରା ନଷ୍ଟ ହେଉଥିବା କୋଷିକା ଓ ଶରୀର ଉପରେ ଏହାର ପ୍ରଭାବ ଉପରେ ଅନୁଧ୍ୟାନ ଆରମ୍ଭ କରିଥିଲେ । ଏଥିରୁ ସ୍ପଷ୍ଟ ହୋଇଥିଲା କି ଯେଉଁ ଆକ୍ରାନ୍ତଙ୍କ ଶରୀରରେ ଟ୍ରୋପୋନିନ ସ୍ତର ଯେତେ ଅଧିକ ସେମାନଙ୍କ ହୃତ ସଂକ୍ରମଣର ମାତ୍ରା ସେତେ ଅଧିକ ବା ଅନ୍ୟ ଶବ୍ଦରେ ସେମାନଙ୍କ ମୃତ୍ୟୁ ଆଶଙ୍କା ସେତେ ଅଧିକ । ତେଣୁ ଗବେଷକମାନେ ସ୍ବାସ୍ଥ୍ୟକର୍ମୀମାନଙ୍କୁ କହିଥିଲେ କି ଆକ୍ରାନ୍ତଙ୍କୁ ମୃତ୍ୟୁ ମୁଖରୁ ବଞ୍ଚାଇବାକୁ ହେଲେ ହସ୍ପିଟାଲରେ ଭର୍ତ୍ତି ହେବାର 24 ଘଣ୍ଟା ମଧ୍ୟରେ ସେମାନଙ୍କ ରକ୍ତ ନମୂନାରେ ଟ୍ରୋପୋନିନ ସ୍ତରର ପରୀକ୍ଷା କରାଯିବା ଆବଶ୍ୟକ ।
ଏହି ରିପୋର୍ଟ ମୁତାବକ ଆକ୍ରାନ୍ତଙ୍କୁ 3ଟି ବିଭାଗରେ ବଣ୍ଟା ଯାଇପାରେ । ଯେଉଁମାନଙ୍କ ମଧ୍ୟରୁ 64 ପ୍ରତିଶତ ସାଧାରଣ ବର୍ଗ, 17 ପ୍ରତିଶତ ସାମାନ୍ୟ ବର୍ଗ ଓ 19 ପ୍ରତିଶତଙ୍କୁ ଗୁରୁତର ବର୍ଗରେ ସାମିଲ କରାଯାଇଥିଲା । ତେବେ ମୁଖ୍ୟତଃ 70 ବର୍ଷରୁ ଉର୍ଦ୍ଧ୍ବ ଆକ୍ରାନ୍ତଙ୍କ ଶରୀରରେ ଟ୍ରୋପୋନିନ ସ୍ତର ଅଧିକ ରହିଥିବା ଦେଖାଯାଏ । ଏହାଛଡା ମଧୁମେହ, ଉଚ୍ଚ ରକ୍ତଚାପ, ଆଟ୍ରିଆଲ ଫାଇବ୍ରିଲେସନ ବା ହୃଦସ୍ପନ୍ଦନର ଗତିରେ ଅନିୟମିତତା, ଶିରା ପ୍ରଶିରାଜନିତ ରୋଗ ଓ ହାର୍ଟ ଫେଲୁଅର ପରି ରୋଗରେ ଆକ୍ରାନ୍ତ ସଂକ୍ରମିତଙ୍କ ଶରୀରରେ ମଧ୍ୟ ଟ୍ରୋପୋନିନ ସ୍ତର ବଢିବାର ଆଶଙ୍କା ରହିଛି ।
ତେବେ ଏହି ଆକ୍ରାନ୍ତଙ୍କ ମୃତ୍ୟୁ ଆଶଙ୍କା କେତେ ଗମ୍ଭୀର ତାହା ମଧ୍ୟ ପରୀକ୍ଷା କରାଯାଇଥିଲା । ଏଥିରୁ ସ୍ପଷ୍ଟ ହୋଇଥିଲା କି ଯେଉଁ ଆକ୍ରାନ୍ତଙ୍କ ଶରୀରରେ ଟ୍ରୋପୋନିନ ସ୍ତର ସାମାନ୍ୟ ରହିଥିଲା ସେମାନଙ୍କୁ ଡାକ୍ତରଖାନାରେ ରହିବାକୁ ପରାମର୍ଶ ଦିଆଯାଇଥିଲା । ସେହିପରି ସାଧାରଣ ଟ୍ରୋପୋନିନସ୍ତର ରହିଥିବା ଆକ୍ରାନ୍ତଙ୍କ ମଧ୍ୟରୁ 75 ପ୍ରତିଶତଙ୍କଠାରେ ମୃତ୍ୟୁ ଆଶଙ୍କା ଦେଖାଦେଇଥିଲା । ଅନ୍ୟପଟେ ଗୁରୁତର ଟ୍ରୋପୋନିନ ସ୍ତର ଥିବା ଆକ୍ରାନ୍ତମାନଙ୍କରେ ମୃତ୍ୟୁ ଆଶଙ୍କା ସାଧାରଣଙ୍କ ତୁଳନାରେ ତିନି ଗୁଣା ଅଧିକା ରହିଥିଲା ।
ଏପରି ସ୍ଥିତିରୁ ଗବେଷକମାନେ ଏହି ସିଦ୍ଧାନ୍ତରେ ଉପନୀତ ହୋଇଥିଲେ କି କୋରୋନା ସଂକ୍ରମିତଙ୍କ ଶରୀରରେ ଟ୍ରୋପୋନିନ ମାଇୟୋକାର୍ଡିଆଲ ଇନଜ୍ୟୁରି ଏକ ସାଧାରଣ କଥା । ହେଲେ ଅଧିକାଂଶଙ୍କ ଶରୀରରେ ଏହା ସାମାନ୍ୟ ରହିଥାଏ । କିନ୍ତୁ ଏହି କଥାକୁ ମଧ୍ୟ ଏଡାଇ ଦିଆଯାଇନପାରେ କି ଆକ୍ରାନ୍ତଙ୍କ ଶରୀରରେ ଟ୍ରୋପୋନିନ ସ୍ତର ଯଦି ସାଧାରଣ ବି ରୁହେ ତେବେ ସେମାନଙ୍କର ମୃତ୍ୟୁ ଆଶଙ୍କା ବୃଦ୍ଧି ପାଏ । ତେବେ ଏହାର ନିରାକରଣ ପାଇଁ ଏଯାବତ୍ କୌଣସି ଉପାୟ ମିଳିନାହିଁ । ବୈଜ୍ଞାନିକ, ଡାକ୍ତର ଓ ଗବେଷକମାନେ ଆଗକୁ ନିଜ ଅନୁଧ୍ୟାନରେ ଏହି ଉପଲବ୍ଧ ତଥ୍ୟକୁ ସାମିଲ କରି ଖୁବଶୀଘ୍ର କିଛି ନୂଆ ତଥ୍ୟ ଯୋଗାଇବେ ବୋଲି ଆଶା କରିଛନ୍ତି ଅନୁ ଲାଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
