ହାଇଦ୍ରାବାଦ: ଲକଡାଉନ ସମୟରେ ସମସ୍ତ ସ୍କୁଲ, କଲେଜ ଓ ଅଫିସ ବନ୍ଦ ଥିବା ବେଳେ ବଢୁଛି ଭିଡିଓ କନଫରେନ୍ସର ଡିମାଣ୍ଡ । ସେ ଅନଲାଇନ କ୍ଲାସ ହେଉ କିମ୍ବା ଅଫିସିଆଲ ମିଟିଂ, ଘରେ ବସି ପ୍ରତ୍ୟେକଟି କାମକୁ ସୁରୁଖୁରୁରେ ନିଭାଇବା ପାଇଁ ଆବଶ୍ୟକ ପଡିଛି ଏହି ଟେକ୍ନୋଲୋଜି । ଲୋକଙ୍କର ଏହି ଆବଶ୍ୟକତା ପୂରଣ କରିଥିବା ଜୁମ ଆପ ଏବେ ଲୋକପ୍ରିୟତା ସାଉଣ୍ଟିବାରେ ଲାଗିଥିବା ବେଳେ କଡା ଟକ୍କର ଦେଉଛି ଗୁଗୁଲ ମିଟ ।
ଏହି ଆପ ହେଉଛି ଗୁଗୁଲର ଭିଡିଓ କନଫରେନ୍ସିଂ ଆପ । ୟାହା ଜୁମକୁ କଡାରୁ କଡା ଟକ୍କର ଦେବା ପାଇଁ ଆଡ କରି ଚାଲିଛି ନୂଆ ଫିଚର । ତେବେ ନିକଟରେ ଗୁଗୁଲ ମିଟ ସହ ଇ-ମେଲକୁ ଆଟାଚ କରିଥିଲା । ଯାହା ଦ୍ବାରା ଜିମେଲରେ ଆକ୍ସେସ କରି ଆପଣ ଭିଡିଓ କଲ ଆଟେଣ୍ଡ କରିପାରିବେ । ତେବେ ଜି ସୁଟ ୟୁଜର୍ସଙ୍କ ପାଇଁ ଆସିଛି ଆଉ କିଛି ଫିଚର୍ସ ।
ପ୍ରଥମ ଫିଚର ହେଉଛି ଗୁଗୁଲ ମିଟ ଦ୍ବାରା ଏବେ ୱେବ ୟୁଜର୍ସମାନେ ଏକାସାଥୀରେ 16 ଜଣ ୟୁଜର୍ସଙ୍କ ସହ ଭିଡିଓ କନଫରେନ୍ସ କରିପାରିବେ । ପୂର୍ବରୁ ଏଥରେ କେବଳ 4 ଜଣ ପାର୍ଟିସିପେଣ୍ଟ ରହିପାରୁଥିବା ବେଳେ ଏବେ କ୍ଷମତା 16କୁ ବୃଦ୍ଧି ପାଇଛି । ତେବେ ଆଗାମୀ ଦିନରେ ଏହି ସଂଖ୍ୟାକୁ ଆହୁରି ବଢାଇ ବଡ ବଡ ମିଟିଂ ପାଇଁ ସାହାଯ୍ୟ କରାଯିବ । ଏନେଇ ଏକ ବ୍ଲଗ ପୋଷ୍ଟରେ ସୂଚନା ଦେଇଛି ଗୁଗୁଲ ।
ଦ୍ବିତୀୟରେ ରହିଛି ‘ପ୍ରେଜେଣ୍ଟ ଓ କ୍ରୋମ ଟ୍ୟାବ’ ଫିଚର । ଏହି ଫିଚର ଦ୍ବାରା ନିଜ ସ୍କ୍ରିନ ଶେୟାର କରିବା ଅପେକ୍ଷା ୟୁଜର୍ସ ଆବଶ୍ୟକୀୟ କେବଳ ଗୋଟିଏ କ୍ରୋମ ଟ୍ୟାବ ଶେୟାର କରିପାରିବେ । ଏଥିସହ ଏଥିରେ ହାଇ କ୍ବାଲିଟି ଭିଡିଓ କଣ୍ଟେଣ୍ଟ ୱିଥ ଅଡିଓର ଏକ ଅପ୍ସନ ରୋଲ ଆଉଟ ହୋଇଛି । ଯାହାକୁ ସିଲେକ୍ଟ କରି ଆପଣ ମିଟିରେ ନିଜର ହାଇ କ୍ବାଲିଟି ଅଡିଓ ସହ ଭିଡିଓ ନୋଟ ଶେୟାର କରିପାରିବେ ।
ତୃତୀୟ ହେଉଛି ‘ଲୋ-ଲାଇଟ ମୋଡ’ । ଏହାଦ୍ବାରା ମିଟ ଆର୍ଟିଫିସିଆଲ ଇଣ୍ଟରଫେସର ବ୍ୟବହାର କରି ଆପଣଙ୍କ ଭିଡିଓର ଲାଇଟକୁ ଆଡଜଷ୍ଟ କରିବ । ଯାହା ଦ୍ବାରା ଆପଣ ଅନ୍ଧାରରେ ଥିଲେ ମଧ୍ୟ ସାମ୍ନା ବ୍ୟକ୍ତିକୁ ସ୍ପଷ୍ଟ ଦେଖାଯିବେ । ବର୍ତ୍ତମାନ ଏହା ମୋବାଇଲ ୟୁଜର୍ସଙ୍କ ପାଇଁ ରୋଲ ଆଉଟ ହେଉଛି । ପରବର୍ତ୍ତୀ ସମୟରେ ଏହା ୱେବ ୟୁଜର୍ସଙ୍କ ପାଇଁ ରୋଲ ଆଉଟ ହେବ ।
ଶେଷରେ ରହିଛି ‘ନଏଜ କ୍ୟାନ୍ସେଲେସନ’ ଫିଚର । ଏହାର ବ୍ୟବହାରରେ ଏହା ଅତି ସ୍ମାର୍ଟ ଭାବେ ଆପଣଙ୍କ ପଛରୁ ଆସୁଥିବା ନଏଜ ଯଥା କୁକୁରର ଭୁକିବା କିମ୍ବା କାହାରି ଚିଲେଇବା ଶବ୍ଦ ଆଦିକୁ ଫିଲ୍ଟର କରିବ । ଫଳରେ ଆପଣ ମିଟିଂ ସମୟରେ ନୋଟ ନେବାରେ ହଇରାଣ ହେବେ ନାହିଁ ।
