ନୂଆଦିଲ୍ଲୀ: ଗୋଆରୁ ନୂଆଦିଲ୍ଲୀ ଅଭିମୁଖେ ଯାତ୍ରା କରୁଥିବା ଏକ ଇଣ୍ଡିଗୋ ବିମାନର ଇଞ୍ଜିନରେ ନିଆଁ ଲାଗିଥିବାର ଖବର ମିଳିଛି । ସୌଭାଗ୍ୟବଶତଃ ଏଥିରେ ଯାତ୍ରା କରୁଥିବା ଯାତ୍ରୀଙ୍କ କୌଣସି କ୍ଷୟକ୍ଷତି ହୋଇନାହିଁ । ଏହି ବିମାନରେ ଗୋଆର ପରିବେଶ ମନ୍ତ୍ରୀ ସହ ମୋଟ 180 ଯାତ୍ରୀ କରୁଥିଲେ ।
ଏନେଇ ମତ ରଖି ଗୋଆର ପରିବେଶ ମନ୍ତ୍ରୀ ନିଲେଶ କାବ୍ରାଲ କହିଛନ୍ତି ଯେ, ରବିବାର ରାତିରେ ଏକ ଇଣ୍ଡିଗୋ ବିମାନ ଦିଲ୍ଲୀ ଅଭିମୁଖେ ଉଡାଣ ଭରିବାର କିଛି ସମୟ ପରେ ହଠାତ ଏହାର ବାମ ପଟେ ଥିବା ଇଞ୍ଜିନରେ ନିଆଁ ଲାଗି ଯାଇଥିଲା । ଏ ଖବର ପାଇବା ପରେ ଏଥିରେ ଯାତ୍ରା କରୁଥିବା ଯାତ୍ରୀ ଭୟଭୀତ ହୋଇ ପଡିଥିଲେ ।
ନିଆଁ ଲାଗିବାର ପ୍ରାୟ 20 ମିନିଟ ପର୍ଯ୍ୟନ୍ତ ଯାତ୍ରୀ ଏହି ବିମାନରେ ଥିଲେ । ସେପଟେ ପାଇଲଟ ବିମାନକୁ ସଠିକ ଭାବେ ନିୟନ୍ତ୍ରଣ କରି ଏହାକୁ ପୁଣି ଥରେ ଗୋଆ ବିମାନବନ୍ଦରକୁ ଫେରାଇ ଆଣିଥିଲେ । ଅନ୍ୟ ଏକ ବିମାନରେ ଗୋଆରୁ ନୂଆଦିଲ୍ଲୀ ଅଭିମୁଖେ ଯାତ୍ରା କରିଥିଲେ ଯାତ୍ରୀ । ଅନ୍ୟପଟେ ମନ୍ତ୍ରୀ କାବ୍ରାଲ ମଧ୍ୟ ସୁରକ୍ଷିତ ଭାବେ ଦିଲ୍ଲୀରେ ପହଞ୍ଚିଛନ୍ତି ।
