ନୂଆଦିଲ୍ଲୀ: ଆର୍ଥିକ ମାନ୍ଦାବସ୍ଥା ଯୋଗୁଁ ଦେଶର ଅର୍ଥନୀତି ଉପରେ ପ୍ରଭାବ ପଡିଛି । ଦେଶର ଜିଡିପି ଅଭିବୃଦ୍ଧି ହାର ଖସିଛି । ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସରେ ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧି ହାର ୫.୮ ପ୍ରତିଶତରୁ ଖସି 5 ପ୍ରତିଶତ ରହିଛି ।
ପୂର୍ବବର୍ଷ ତୁଳନାରେ ଚଳିତ 2019-20 ଆର୍ଥିକ ବର୍ଷର ପ୍ରଥମ ତ୍ରୈମାସରେ ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧି ହାର 5 ପ୍ରତିଶତକୁ ଖସିଛି । ଏହା ଗତ ସାଢ଼େ ୬ ବର୍ଷରେ ସର୍ବନିମ୍ନ ବୋଲି ଜଣାପଡ଼ିଛି । ଉତ୍ପାଦନ କ୍ଷେତ୍ରରେ ଧୀମା ପ୍ରଦର୍ଶନ ଯୋଗୁଁ ଏହି ଜିଡିପି ହାର ହ୍ରାସ ପାଇଥିବା ଜଣାପଡିଛି । କେନ୍ଦ୍ରୀୟ ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ ଏହି ସୂଚନା ମିଳିଛି ।
କୃଷି କ୍ଷେତ୍ରରେ ଅଭିବୃଦ୍ଧି ହାର ଗତବର୍ଷ 5.1 ପ୍ରତିଶତ ଥିବା ବେଳେ ଚଳିତ ବର୍ଷ ଏହା 2 ପ୍ରତିଶତକୁ ହ୍ରାସ ପାଇଛି । ସେହିପରି ଉତ୍ପାଦନ କ୍ଷେତ୍ରରେ ଗତବର୍ଷ 12.1 ପ୍ରତିଶତ ରହିଥିବା ବେଳେ ଚଳିତ ବର୍ଷ 0.6 ପ୍ରତିଶତକୁ ଖସିଛି ।
ଗତ 2012-13 ଆର୍ଥିକ ବର୍ଷର ଜାନୁଆରୀ-ମାର୍ଚ୍ଚ ମାସରେ ଦେଶର ଅର୍ଥନୈତିକ ଅଭିବୃଦ୍ଧି ସର୍ବନିମ୍ନ 4.9 ପ୍ରତିଶତ ରହିଥିଲା । ସେହିପରି 2018-19ରେ ଅର୍ଥନୈତିକ ଅଭିବୃଦ୍ଧି ସର୍ବାଧିକ 8 ପ୍ରତିଶତ ରହିଥିଲା ।
