ରାଞ୍ଚି: ଝାଡଖଣ୍ଡରେ ଦେଖାଦେଇଛି ଜଳ ସଙ୍କଟ । ରାଜ୍ୟରେ ଥିବା ଦାମୋଦର ନଦୀରେ ଫର୍ନେସ ତୈଳ ମିଶିବା ଯୋଗୁଁ ପାଣି ସମ୍ପୂର୍ଣ୍ଣ ଭାବେ ପ୍ରଦୂଷିତ ହୋଇଯାଇଛି । ଫଳରେ ଲୋକଙ୍କ ମଧ୍ୟରେ ହଇଚଇ ମଚିଯାଇଛି । ଓ୍ବାଟର ପ୍ଲାଣ୍ଟ ଖରାପ ନହେଇଯାଉ ସେ ନେଇ ଏହାକୁ ସମ୍ପୂର୍ଣ୍ଣ ରୂପେ ବନ୍ଦ କରିଦିଆଯାଇଛି ।
ଭିଡିଓ ସୌଜନ୍ୟ: ଇଟିଭି ଭାରତ ବ୍ୟୁରୋ
ସୂଚନାମୁତାବକ, ଏହି ବିଷାକ୍ତ ତୈଳ ବୋକାରୋ ଷ୍ଟିଲ ପ୍ଲାଣ୍ଟରୁ ଛଡାଯାଉଥିବା ଅନୁମାନ କରାଯାଉଛି । ଜାମଡୋବା ଓ୍ବାଟର ପ୍ଲାଣ୍ଟରୁ ପାଣି ସପ୍ଲାଇ ବନ୍ଦ ହେବା କାରଣରୁ ଝରିଆ, କତରାସର ଆଖପାଖ ଅଞ୍ଚଳର ପ୍ରାୟ 12 ଲକ୍ଷରୁ ଊର୍ଦ୍ଧ୍ବ ଲୋକେ ପାଣି ସମସ୍ୟା ଭୋଗୁଛନ୍ତି । ଘଟଣାସ୍ଥଳରେ ଉପସ୍ଥିତ ଜଣେ ଅଧିକାରୀ କହିଛନ୍ତି ଯେ, ଏହି ଘଟଣାର ସୂଚନା ଦିଆଯିବା ପରେ ଓ୍ବାଟର ପ୍ଲାଣ୍ଟକୁ ବନ୍ଦ କରିଦିଆଯାଇଛି ।
ଘଟଣାର ଖବର ବିଭାଗୀୟ ଅଧିକାରୀଙ୍କୁ ଦିଆଯାଇଛି । ଏନେଇ ଖୁବ ଶୀଘ୍ର ଏହି ସମସ୍ୟାର ସମାଧାନ କରାଯିବ ।
