ରାୟପୁର: ବନ୍ଦୀ ଜୀବନରୁ ମୁକ୍ତି ପାଇଲେ କଇଁଛ । ଶୁଣିବାକୁ ଆଶ୍ଚର୍ଯ୍ୟ ଲାଗିଲେ ମଧ୍ୟ ଏହା ସତ । ଘଟଣାଟି ହେଉଛି ଛତିଶଗଡ଼ର ରାଜନାନ୍ଦଗାଓଁ ଅଞ୍ଚଳର । ଦୀର୍ଘ ଦିନରୁ ଏହି କଇଁଛ ଗୁଡ଼ିକ ଏକ ପାଣିଟାଙ୍କି ମଧ୍ୟରେ ବନ୍ଦୀ ଭାବେ ରହିଥିଲେ । ସେମାନଙ୍କୁ ଉଦ୍ଧାର ପାଇଁ କୋର୍ଟରେ ମଧ୍ୟ ମାମଲା ହୋଇଥିଲା ।
ମିଳିଥିବା ସୂଚନା ମୁତାବକ ରାଜନାନ୍ଦଗାଓଁରେ ଏକ ପାଣି ଟାଙ୍କିରେ 3ଟି କଇଁଛ ବନ୍ଦୀ ଭାବେ ରହିଥିଲେ । ତେବେ ଏହାକୁ ନେଇ ‘ଇଟିଭି ଭାରତ’ ପ୍ରଥମେ ଖବର ପ୍ରକାଶ କରିଥିଲା । ପରେ ଏନେଇ କୋର୍ଟରେ ମଧ୍ୟ ମାମଲା ରୁଜୁ ହୋଇଥିଲା । ମାମଲାରୁ ଶୁଣାଣି କରି 3କଇଁଛଙ୍କୁ ପାଣିଟାଙ୍କିରୁ ବାହାର କରି ନଦୀରେ ଛାଡି଼ବାକୁ କୋର୍ଟ ନିର୍ଦ୍ଦେଶ ଦେଇଥିଲେ ।
କୋର୍ଟଙ୍କ ନିର୍ଦ୍ଦେଶ ମୁତାବକ ଉଭୟ ବନବିଭାଗ ଓ ବସନ୍ତପୁର ପୋଲିସ କର୍ମଚାରୀଙ୍କ ଉପସ୍ଥିତିରେ ସେମାନଙ୍କୁ ଶିବନାଥ ନଦୀରେ ଛଡାଯାଇଛି । ତେବେ ଗଣମାଧ୍ୟମରେ ଏହି ଖବର ପ୍ରକାଶ ପାଇବା ପରେ ପୋଲିସ ମଧ୍ୟ ତଦନ୍ତକୁ ଜୋରଦାର କରିଥିଲା ।
ପୋଲିସ କହିଛି କି 2015 ମସିହାରେ ଏହି କଇଁଛଙ୍କୁ 6 ଜଣ ଲୋକଙ୍କ ଠାରୁ ଜବତ କରାଯାଇଥିଲା । ଏହି କଇଁଛ ଗୁଡ଼ିକୁ ବିଭିନ୍ନ ପ୍ରକାର ଯାଦୁବିଦ୍ୟାରେ ବ୍ୟବହାର କରୁଥିଲେ । ତେବେ ଏହି କଇଁଛ ଗୁଡ଼ିକୁ ଉଦ୍ଧାର କରାଯିବା ପରେ ବନ ବିଭାଗ ଏହା ଉପରେ ନଜର ରଖିଥିଲା ବୋଲି ପୋଲିସ ସୂଚନା ଦେଇଛି ।
ଏହି କଇଁଛ ଗୁଡ଼ିକୁ ଉଦ୍ଧାର ପାଇଁ ପୋଲିସ ପକ୍ଷରୁ କୋର୍ଟରେ ମାମଲା ରୁଜୁ ହୋଇଥିଲା । କୋର୍ଟର ଚୂଡ଼ାନ୍ତ ନିଷ୍ପତ୍ତିକୁ ଅପେକ୍ଷା କରାଯାଇଥିଲା । କଇଁଛ ଗୁଡ଼ିକୁ ନଦୀରେ ଛଡ଼ାଯିବାକୁ କୋର୍ଟ ନିଷ୍ପତ୍ତି ନେବା ପରେ ସେଗୁଡ଼ିକୁ ବନବିଭାଗ ତତ୍ତ୍ବାବଧାନରେ ନଦୀରେ ଛଡ଼ାଯାଇଥିବା ପୋଲିସ ପକ୍ଷରୁ ସୂଚନା ମିଳିଛି ।
