ଚଣ୍ଡିଗଡ: ଶେଷରେ ବାୟୁସେନାରେ ସାମିଲ ହୋଇଛି ଚିନୁକ ହେଲିକପ୍ଟର। ସୋମବାର ବାୟୁସେନା ମୁଖ୍ୟ ମାର୍ଶଲ ବିଏସ୍ ଧନୋଆ ଚଣ୍ଡିଗଡରେ 4ଟି ଚିନୁକ ହେଲିକପ୍ଟରକୁ ବାୟୁସେନାରେ ସାମିଲ କରିଛନ୍ତି। ଭାରତକୁ ପ୍ରଥମ ଚିନୁକ ମିଳିବା ପରେ ବାୟୁସେନାରେ ଏହାର ସାମିଲ ନେଇ ଅନେକ ଚର୍ଚ୍ଚା ଚାଲିଥିଲା । ଏହା ସାମରିକ ଅଭିଯାନକୁ ଆହୁରି ଶକ୍ତିଶାଳୀ କରିବ।
ସମୁଦ୍ର ପତ୍ତନଠାରୁ ବହୁ ଉଚ୍ଚତାରେ ଅବସ୍ଥିତ ସ୍ଥାନରେ ସୈନିକ ଏବଂ ଯନ୍ତ୍ରପାତି ପରିବହନ ପାଇଁ ଚିନୁକର ବ୍ୟବହାର କରାଯିବ। ଏହି ହେଲିକପ୍ଟର ୨୩,୦୦୦ କିଲୋଗ୍ରାମର ଓଜନ ଏକାଥରେ ଉଠାଇପାରିବ । ଏହା ଘଣ୍ଟାପ୍ରତି ସର୍ବାଧିକ ୩୦୨ କିଲୋମିଟର ବେଗରେ ଗତି କରିପାରିବ । ଏହାଛଡା ଚିନୁକ ହେଲିକପ୍ଟରକୁ ସାମରିକ ଅଭିଯାନ ଓ ଉଦ୍ଧାର କାର୍ଯ୍ୟରେ ନିୟୋଜନ କରାଯାଇପାରିବ।
ସେପ୍ଟେମ୍ବର 2015ରେ ଭାରତ ୧୫ଟି ଚିନୁକ ହେଲିକପ୍ଟର ପାଇଁ ଆମେରିକା ସହ ୧.୫ ବିଲିୟନ ଡଲାରର ଏକ ଚୁକ୍ତି ସ୍ୱାକ୍ଷର କରିଥିଲା। ଏବର୍ଷ ଫେବୃୟାରୀରେ ଫିଲଡେଲଫିଆରେ ଆମେରିକାର ଭାରତୀୟ ରାଷ୍ଟ୍ରଦୂତ ହର୍ଶ ଶ୍ରିଙ୍ଗଲାଙ୍କ ଉପସ୍ଥିତିରେ ଭାରତକୁ ପ୍ରଥମ ହେଲିକପ୍ଟର ମିଳିଥିଲା। ସେଥିରୁ ପ୍ରଥମ ୪ଟି ହେଲିକପ୍ଟର ଆମେରିକାରୁ ଆସି ଗତମାସ ଗୁଜରାଟର ମୁନ୍ଦ୍ରା ବନ୍ଦରରେ ପହଞ୍ଚିଥିଲା। ଏହି ହେଲିକପ୍ଟର ବ୍ୟବହାର କରିବାରେ ଭାରତ ହେଉଛି ବିଶ୍ୱର ୧୯ ତମ ଦେଶ । ଭାରତ ପୂର୍ବରୁ 18ଟି ଦେଶ ଯୁଦ୍ଧ ତଥା ବିଭିନ୍ନ କାର୍ଯ୍ୟରେ ଏହାର ବ୍ୟବହାର କରିସାରିଛନ୍ତି।
ସୂଚନାଯୋଗ୍ୟ ଯେ ୨୦୧୫ ଚୁକ୍ତି ଅନୁସାରେ ଭାରତ ୨୨ଟି ଏଏଚ-୬୪ଇ ଆପାଚ ଆଟାକ ଏବଂ ୧୫ଟି ସିଏଚ-୪୭ଏଫ(୧) ଚିନୁକ ଟ୍ରାନ୍ସପୋର୍ଟ ହେଲିକପ୍ଟର ଲାଗି ବରାଦ ଦେଇଥିଲା। ଏହି ଦୁଇ ପ୍ରକାରର ହେଲିକପ୍ଟର ବିମାନ ଜଗତରେ ସମ୍ପୂର୍ଣ୍ଣ ନୂଆ ମଡେଲ। ଏହା ଭାରତୀୟ ବାୟୁସେନାର ହେଲିକପ୍ଟର ବିଭାଗକୁ ଆଧୁନିକୀକରଣ କରିବ ବୋଲି ଆଶା କରାଯାଉଛି । ସିଏଚ-୪୭ଏଫ ଚିନୁକକୁ ମଧ୍ୟ ବିଶ୍ବର ଅନ୍ୟାନ୍ୟ ପ୍ରମୁଖ ରାଷ୍ଟ୍ରର ପ୍ରତିରକ୍ଷା ବିଭାଗ ବ୍ୟବହାର କରୁଛନ୍ତି । ବୋଇଙ୍ଗ ଏହି ହେଲିକପ୍ଟର ପାଇଁ ଭାରତୀୟ ବାୟୁସେନାର ଅଫିସରଙ୍କୁ ଅକ୍ଟୋବର ମାସରେ ଟ୍ରେନିଂ ଦେଇଛି।
ପୂର୍ବରୁ ବାୟୁସେନା ପ୍ରମୁଖ ବିଏସ ଧାନୋଆ ଗତ 86ତମ ବାୟୁସେନା ଦିବସରେ କହିଥିଲେ ଯେ ବିଗତ 8 ଦଶନ୍ଧି ଧରି ବାୟୁସେନା ବୈଷୟିକ ଜ୍ଞାନକୌଶଳ ଉପରେ ଗୁରୁତ୍ବ ଦେଇ ଆସୁଛି। ଆଗକୁ 36ଟି ରାଫେଲ, ଏସ-400 ବାୟୁ ପ୍ରତିରକ୍ଷା ପ୍ରଣାଳୀ, ଆପାଚ ଆଟାକ ହେଲିକପ୍ଟର ଏବଂ ଚିନୁକ ହେଭି ଲିଫ୍ଟ ହେଲିକପ୍ଟର ବାୟୁସେନାରେ ସାମିଲ ହେବାକୁ ଅଛି । ଯାହା ପରେ ଏହାର ଶକ୍ତି ଢେର ଗୁଣ ବଢିଯିବ ବୋଲି ଆଶା ରହିଛି।
