ନୂଆଦିଲ୍ଲୀ: ବନ୍ଦେ ଭାରତ ମିଶନ ଅଧୀନରେ ଅଷ୍ଟ୍ରେଲିଆରୁ ଭାରତକୁ ଆସିଛି ପ୍ରଥମ ବିମାନ । ଏଥିରେ 223 ଭାରତୀୟ ସ୍ବଦେଶ ଫେରିଛନ୍ତି । ଗୁରୁବାର ଟ୍ବିଟରରେ ଏମାନଙ୍କୁ ସ୍ବାଗତ କରିଛନ୍ତି ବୈଦେଶିକ ମନ୍ତ୍ରୀ ଏସ ଜୟଶଙ୍କର ।
ଏୟାର ଇଣ୍ଡିଆ ବିମାନ 301ରେ ସିଡନୀରୁ 223 ଜଣ ଭାରତୀୟ ନୂଆଦିଲ୍ଲୀ ଫେରିଥିଲେ । କୋଭିଡ-19 ମହାମାରୀ ଯୋଗୁଁ ସେଠାରେ ଏମାନେ ଫସିରହିଥିଲେ । ଅଷ୍ଟ୍ରେଲିଆରୁ ପ୍ରଥମ ବିମାନ ଭାବେ ଏହା ଫସିଥିବା ଭାରତୀୟଙ୍କୁ ନେଇ ଫେରିଛି । ଏଥିପାଇଁ ଜୟଶଙ୍କର ଅଷ୍ଟ୍ରେଲିଆ ସରକାରଙ୍କ ସହ ସେଠାରେ ଥିବା ଭାରତୀୟ ହାଇକମିଶନଙ୍କୁ ଧନ୍ୟବାଦ ଦେଇଛନ୍ତି ।
ଏହାସହ ସେ ଏୟାର ଇଣ୍ଡିଆ କର୍ତ୍ତୃପକ୍ଷ ଓ ଦିଲ୍ଲୀ ସରକାରଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି । ଏବେ ଯାଏଁ ପ୍ରାୟ 20 ହଜାରରୁ ଅଧିକ ଭାରତୀୟଙ୍କୁ ବିଦେଶରୁ ଫେରାଇ ଅଣାଯାଇଛି ବୋଲି କେନ୍ଦ୍ର ବିମାନ ଚଳାଚଳ ମନ୍ତ୍ରୀ ସୂଚନା ଦେଇଛନ୍ତି । ଏବେ ଏହି ମିଶନର ଦ୍ବିତୀୟ ପର୍ଯ୍ୟାୟ ଜାରି ରହିଛି । ମେ 7ରୁ ପ୍ରଥମ ପର୍ଯ୍ୟାୟରେ ଅନେକ ଭାରତୀୟଙ୍କୁ ଫେରାଇ ଅଣାଯାଇଥିଲା ।
