ନୂଆଦିଲ୍ଲୀ: ଦକ୍ଷିଣ-ପୂର୍ବ ଦିଲ୍ଲୀର ଜାକିର୍ ନଗର ଅଞ୍ଚଳରେ ଥିବା ଏକ 4 ମହଲା କୋଠାରେ ଭୟାବହ ଅଗ୍ନିକାଣ୍ଡ ଘଟିଛି । ଏଥିରେ 5 ଜଣଙ୍କ ମୃତ୍ୟୁ ହୋଇଥିବାବେଳେ 11 ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ 2 ଜଣ ଶିଶୁ ରହିଛନ୍ତି । ଘଟଣାସ୍ଥଳରେ ଅଗ୍ନିଶମ ବାହିନୀର 8ଟି ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ ପାଖପାଖି 20 ଲୋକଙ୍କୁ ନିଆଁ କବଳରୁ ସୁରକ୍ଷିତ ଉଦ୍ଧାର କରାଯାଇଛି ।
ସୂଚନାନୁସାରେ, ସୋମବାର ବିଳମ୍ବିତ ରାତିରେ ଜାକିର୍ ନଗର ବାଟଲା ହାଉସ୍ର ଜୀଗାବାଇର 7 ନମ୍ବର ଗଳିରେ ଥିବା 4 ମହଲା ବିଶିଷ୍ଟ ଏକ କୋଠାରେ ବିସ୍ଫୋରଣ ହୋଇଥିଲା । ସଟ୍ସର୍କିଟ୍ କାରଣରୁ ଏହି ନିଆଁ ଲାଗିଯାଇଥିଲା । ନିଆଁ ପ୍ରଥମେ ବିଲ୍ଡିଂ ତଳେ ଥିବା ପାର୍କିଂ ଅଞ୍ଚଳରେ ଲାଗିଥିଲା । ଅଧିକାଂଶ ଲୋକ ନିଜକୁ ବଞ୍ଚାଇବାକୁ ଯାଇ ବିଲ୍ଡିଂରୁ ତଳକୁ ଡେଇଁ ଥିଲେ । ଆହତଙ୍କୁ ଚିକିତ୍ସା ପାଇଁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।
ଏହି ଅଗ୍ନିକାଣ୍ଡରେ ପାର୍କିଂ ଜୋନ୍ରେ ଥିବା ପାଖାପାଖି 7ଟି କାର୍ ଏବଂ 8ଟି ମୋଟରସାଇକେଲ ଜଳିପୋଡି ନଷ୍ଟ ହୋଇଛି। ଉକ୍ତ ଘଟଣାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଦୁଃଖ ପ୍ରକାଶ କରିବା ସହ ଆହତଙ୍କୁ 2 ଲକ୍ଷ ଏବଂ ମୃତକଙ୍କ ପରିବାରକୁ 5 ଲକ୍ଷ ଟଙ୍କା ସହାୟତା ରାଶି ଦେବାକୁ ଘୋଷଣା କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
