ଲୁଧିଆନା: ପଞ୍ଜାବ ଲୁଧିଆନାସ୍ଥିତ ଏକ କପଡା କାରଖାନାରେ ଭୟଙ୍କର ଅଗ୍ନିକାଣ୍ଡ । ରବିବାର ସନ୍ଧ୍ୟାରେ ଲୁଧିଆନାର କଙ୍ଗାନୱାଲା ରୋଡ଼ସ୍ଥିତ ଏକ ହଜାରି ଫ୍ୟାକ୍ଟ୍ରି ବା କପଡା କାରଖାନାରେ ନିଆଁ ଲାଗିଯାଇଛି । ସୂଚନା ପାଇଁ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଛି । ଏହି ଅଗ୍ନିକାଣ୍ଡରେ କୌଣସି ବ୍ୟକ୍ତି ମୃତାହତ ହୋଇନଥିବା ବେଳେ ଲକ୍ଷାଧିକ ମୂଲ୍ୟର ସମ୍ପତ୍ତି ନଷ୍ଟ ହୋଇଥିବା ସୂଚନା ରହିଛି ।
ସେହିପରି ପଶ୍ଚିମବଙ୍ଗର ରାଜଧାନୀ କୋଲକାତାରେ ମଧ୍ୟ ଆଜି ସନ୍ଧ୍ୟାରେ ଅଗ୍ନିକାଣ୍ଡ ହୋଇଥିବା ସୂଚନା ରହିଛି । ଏଠାରେ ଲେନୀନ ସାରାନୀ ଅଞ୍ଚଳରେ ଥିବା ଏକ ହୋଟେଲରେ ଭୟଙ୍କର ନିଆଁ ଲାଗିଛି । ତେବେ ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ସେପଟେ ଘଟଣା ସମ୍ପର୍କରେ ଅଗ୍ନିଶମ ବିଭାଗ ଖବର ପାଇ ଘଟଣାସ୍ଥଳକୁ ପହଞ୍ଚିଛନ୍ତି । ଏଠାରେ ନିଆଁ ଲିଭାଇବା ପାଇଁ 5ଟି ଦମକଳ ଗାଡି ପହଞ୍ଚିଛି । ନିଆଁଲିଭା କାର୍ଯ୍ୟ ଜାରି ରହିଛି । ଏହି ଘଟଣାରେ କୌଣସି ଲୋକେ ଆହତ ହୋଇନାହାଁନ୍ତି ।
