ନୂଆଦିଲ୍ଲୀ: ସାରା ଦେଶରେ ନୂଆ କୃଷି ଆଇନକୁ ନେଇ ପ୍ରତିବାଦ ଚାଲିଥିବାବେଳେ ଆଜି କୃଷକ ଦିବସରେ ଦେଖିବାକୁ ମିଳିଛି ଏକ ବିରଳ ଘଟଣା । ଦିଲ୍ଲୀ-ଉତ୍ତର ପ୍ରଦେଶ ସୀମାସ୍ଥିତ ଗାଜିପୁର ସୀମାରେ କୃଷକ ନେତା ତେଜେନ୍ଦ୍ର ସିଂ ରକ୍ତରେ ଚିଠି ଲେଖି ଦେଶବାସୀଙ୍କୁ କୃଷକ ଆନ୍ଦୋଳନକୁ ସମର୍ଥନ କରିବାକୁ ନିବେଦନ କରିଛନ୍ତି ।
ତେଜେନ୍ଦ୍ର ସିଂ ଉକ୍ତ ଚିଠିରେ ଲେଖିଛନ୍ତି ଯେ ଯେଉଁମାନେ ଭାରତ ମାତାକୁ ଖାଇବାକୁ ଦିଅନ୍ତି, ସେମାନେ ଆଜି ଭୋକରେ ରାଜରାସ୍ତାରେ ପଡିବାକୁ ବାଧ୍ଯ ହୋଇଛନ୍ତି । ତେଣୁ ବର୍ତ୍ତମାନ ଦେଶବାସୀ ସେମାନଙ୍କ ସମର୍ଥନରେ ବାହାରିବାର ଆବଶ୍ୟକତା ଅଛି । ଆଜିର କୃଷକ ଦିବସ ଅବସରରେ ଏକବକ୍ତ ଭୋଜନ ଛାଡି କୃଷକ ଆନ୍ଦୋଳନକୁ ସମର୍ଥନ ଦେବାକୁ ସେ ଦେଶବାସୀଙ୍କୁ ଉକ୍ତ ଚିଠି ମାଧ୍ୟରେ ନିବେଦନ କରିଥିବା ଜଣାପଡିଛି ।
ଗତ ପ୍ରାୟ ଚାରି ସପ୍ତାହ ଧରି କୃଷକମାନେ କେନ୍ଦ୍ରୀୟ କୃଷି ଆଇନ ବିରୋଧରେ ପ୍ରତିବାଦ କରିଆସୁଥିବାବେଳେ ଏହାର ସମାଧାନ ହେବା ପରିବର୍ତ୍ତେ ଦିନକୁ ଦିନ ଆହୁରି ବ୍ୟାପକ ରୂପ ଧାରଣ କରିବାରେ ଲାଗିଛି । ଯେ ଯେପର୍ଯ୍ୟନ୍ତ କେନ୍ଦ୍ର ସରକାର କୃଷି ଆଇନକୁ ପ୍ରତ୍ୟାହାର କରିନେଇଛନ୍ତି ଏବଂ ଏମଏସପି ଗ୍ୟାରେଣ୍ଟି ଉପରେ ଆଇନ ପ୍ରଣୟନ ନକରନ୍ତି, ସେ ପର୍ଯ୍ୟନ୍ତ ଆନ୍ଦୋଳନ ଶେଷ କରିବେ ନାହିଁ ବୋଲି ବିଭିନ୍ନ କୃଷକ ସଂଗଠନ ସ୍ପଷ୍ଟ କରିସାରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
