ନୂଆଦିଲ୍ଲୀ: ବାୟୁ ପ୍ରଦୂଷଣ ବ୍ୟାପକ ହେବାରୁ ଆଜିଠୁ ଯୁଗ୍ମ-ଅଯୁଗ୍ମ ଫର୍ମୁଲା ଲାଗୁ କରିଛନ୍ତି ଦିଲ୍ଲୀ ସରକାର । ଏହି ନିୟମ ସକାଳ 8ରୁ ସଂଧ୍ୟା 8ଟା ପର୍ଯ୍ୟନ୍ତ ଲାଗୁ ହେବା । ଏହା ନଭେମ୍ବର 15ପର୍ଯ୍ୟନ୍ତ ଚାଲୁ ରହିବ । ତେବେ କେବଳ ରବିବାର ବ୍ୟତୀତ ସମସ୍ତ ଦିନ 15 ଯାଏଁ ଏହି ନିୟମ ବଳବତ୍ତର ରହିବ । ଏହାକୁ ନେଇ ଦିଲ୍ଲୀ ସରକାର ବ୍ୟାପକ ପଦକ୍ଷେପ ଗ୍ରହଣ କରିଛନ୍ତି ।
ଅନ୍ୟପଟେ ଆଜି ପୁଣି ଥରେ କେନ୍ଦ୍ର ପରିବେଶ ମନ୍ତ୍ରୀ ପ୍ରକାଶ ଜାଭେଡକର କେଜ୍ରିୱାଲଙ୍କ ଉପରେ ବର୍ଷିଛନ୍ତି । ପ୍ରକାଶ ଜାଭେଡକର କହିଛନ୍ତି ଆମେ ଚାଷୀଙ୍କୁ 11ଶହ କୋଟି ଟଙ୍କା ସହାୟତା ଦେଇଛୁ । ଯଦି ଦିଲ୍ଲୀ ପ୍ରଦୂଷଣ କମାଇବା ପାଇଁ ମୁଖ୍ୟମନ୍ତ୍ରୀ ଚିନ୍ତା କରିଥାନ୍ତେ ବିଜ୍ଞାପନରେ 15ଶହ କୋଟି ଟଙ୍କା ଖର୍ଚ୍ଚ ନକରି ଚାଷୀଙ୍କୁ ସହାୟତା ଦେଇଥିଲେ ସେମାନେ ଏବେ ନଡା ପୋଡି ନଥାନ୍ତେ ବୋଲି ପ୍ରକାଶ କହିଛନ୍ତି । ଏହାସହ ସେ ଆହୁରି କହିଛନ୍ତି ପରିବେଶ ସଂରକ୍ଷଣ ଭାରତୀୟଙ୍କ ଜୀବନରରେ ଏକ ଅଙ୍ଗ ହୋଇଛି । କିନ୍ତୁ ତାହା ବହୁଳ ବ୍ୟବହାର ହୋଇପାରି ନାହିଁ । ଏହା ଏବେ ବଡ ପ୍ରସଙ୍ଗ ହୋଇଛି । ସେ କେଜ୍ରିୱାଲଙ୍କୁ ପରାର୍ମଶ ଦେଇ କହିଛନ୍ତି ଯଦି ଦିଲ୍ଲୀ ସରକାର କାର୍ଯ୍ୟକ୍ରମ ଆରମ୍ଭ କରି ପଦକ୍ଷେପ ନେବେ କେନ୍ଦ୍ର ସରକାର ସମସ୍ତ ସହାୟତା ଯୋଗାଇବେ ।
ସେପଟେ ମୁଖ୍ୟମନ୍ତ୍ରୀ କେଜ୍ରିୱାଲ ପ୍ରକାଶଙ୍କୁ ଦୃଢ ଜବାବ ଦେଇ କହିଛନ୍ତି କେନ୍ଦ୍ର ସରକାର ମିଛ କହୁଛନ୍ତି । ବିଜ୍ଞାପନରେ ଆମେ ମାତ୍ର 1ରୁ 2କୋଟି ଖର୍ଚ୍ଚ କରିଛୁ । ପୁରା ଉତ୍ତର ଭାରତରେ କଣ ରହିଛି ସ୍ଥିତି ନାସାର ସାଟେଲାଇଟ ଫଟୋରେ ସ୍ପଷ୍ଟ ହେଉଛି । ପୁରା ଉତ୍ତର ଭାରତରେ ଧୂଆଁର ଚାଦର ପଡିଛି । ଆମେ ଦିଲ୍ଲୀ ଜନତାଙ୍କ ସୁରକ୍ଷା ପାଇଁ ସବୁ ପଦକ୍ଷେପ ନେଉଛୁ । ଆମ ଦ୍ବାରା ଯାହା ସମ୍ଭବ ଆମେ ପ୍ରଦୂଷଣ କମ କରିବା ପାଇଁ ପଦକ୍ଷେପ ନେଉଛୁ । ଦିଲ୍ଲୀ ବାହାରୁ ଯେଉଁ ପ୍ରଦୂଷଣ ଆସୁଛି ତାକୁ ଆମେ କମ କରିପାରିବୁ ନାହିଁ । ଆମ ଦ୍ବାରା ଯୁଗ୍ମ ଅଯୁଗ୍ମ ସମ୍ଭବ ଥିଲା ଆମେ କରୁଛୁ । ଏହାଦ୍ବାରା ଦିଲ୍ଲୀରେ ଦୈନିକ 30ଲକ୍ଷ ଗାଡି ରାସ୍ତାରେ ଚାଲୁଥିବା ବେଳେ ଆଜି 15ଲକ୍ଷ ଗାଡି ଚାଲୁଛି । ଏହାଦ୍ବାରା ପ୍ରଦୂଷଣର ମାତ୍ରା କିଛି ଅଂଶରେ କମିବ ବୋଲି ସେ ଆଶାବାଦୀ ଥିବା କହିଛନ୍ତି ।
