ନୂଆଦିଲ୍ଲୀ: ଉତ୍ତର-ପୂର୍ବ ଦିଲ୍ଲୀ ହିଂସାରେ ମୃତ୍ୟୁ ସଂଖ୍ୟା ଦିନକୁ ଦିନ ବଢିବାରେ ଲାଗିଛି । ବର୍ତ୍ତମାନ ଏହାର ସଂଖ୍ୟା 46ରେ ପହଞ୍ଚିଛି । ଏହାସହ ମିଥ୍ୟା ପ୍ରଚାର ଲୋକଙ୍କ ମନରେ ଭୟ ସୃଷ୍ଟି କରୁଛି । ମାତ୍ର ଦିଲ୍ଲୀ ପୋଲିସ ଏଭଳି ପ୍ରଚାର ଠାରୁ ଦୂରେଇ ରହିବାକୁ ଅପିଲ କରିଛନ୍ତି । ଅନ୍ୟପକ୍ଷେ ଦିଲ୍ଲୀ ପୋଲିସର ସ୍ପେଶାଲ ସେଲ୍ ଆତଙ୍କବାଦୀ ସଙ୍ଗଠନ କେସିପିର ଦୁଇ ସନ୍ଦିଗ୍ଧ ସଦସ୍ୟଙ୍କୁ ଗିରଫ କରାଯାଇଛି ।
ଡିସିପି ଦୀପକ ପୁରୋହିତଙ୍କ ବୟାନ ଅନୁସାରେ, ହିଂସାକୁ ନେଇ ଦିଲ୍ଲୀର ପଶ୍ଚିମ ଜିଲ୍ଲାରେ ମିଥ୍ୟା ପ୍ରଚାରିତ ହେଉଥିବାର ସୂଚନା ମିଳିଛି ମାତ୍ର ଏଥିରେ ସତ୍ୟତା ନଥିବା କହିବା ସହ ଜିଲ୍ଲାରେ ଶାନ୍ତି ବଜାୟ ରଖିବା ପାଇଁ ସେ ଅପିଲ କରିଛନ୍ତି । ଉତ୍ତର-ପୂର୍ବ ଦିଲ୍ଲୀରେ ହିଂସାକୁ ପ୍ରାୟ ଏକ ସପ୍ତାହ ବିତି ଯାଇଥିଲେ ସୁଦ୍ଧା ସେଠାରେ ଏବେ ବି ବ୍ୟାପକ ପୋଲିସ ମୁତୟନ ହୋଇଛନ୍ତି ।
ଅନ୍ୟପକ୍ଷେ ରବିବାର ଗୋକଲପୁରୀ ଓ ଶିବବିହାର ଅଞ୍ଚଳରୁ ପ୍ରାୟ 4ଟି ମୃତଦେହ ଜବତ କରାଯାଇଛି । ମାତ୍ର ଏହା ଦଙ୍ଗା ସମୟର କି ନାହିଁ ତାହା ସ୍ପଷ୍ଟ ହୋଇନାହିଁ । ଦଙ୍ଗା ପରେ ଉତ୍ତର-ପୂର୍ବ ଦିଲ୍ଲୀରେ ଏଟିଏମ୍ ଓ ବ୍ୟାଙ୍କ ସେବା ମଧ୍ୟ ବନ୍ଦ ରହିଛି । ଗତ ତିନି ଦିନ ମଧ୍ୟରେ କୌଣସି ଅପ୍ରିୟ ଘଟଣା ସାମ୍ନାକୁ ଆସିନଥିବା ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
