ଥିରୁଅନନ୍ତପୁରମ୍: ମାଓବାଦୀଙ୍କ ସହ ସମ୍ପର୍କ ଥିବା ଅଭିଯୋଗରେ କେରଳର ଦୁଇ କର୍ମୀଙ୍କୁ ବହିଷ୍କୃତ କରିଛି ସିପିଆଇ(ଏମ୍) । ଗତବର୍ଷ ନଭେମ୍ବରରେ ମାଓବାଦୀଙ୍କ ସହିତ ଲିଙ୍କ ଥିବା ଅଭିଯୋଗରେ ଦୁହିଁଙ୍କୁ ଗିରଫ କରାଯାଇଥିବାବେଳେ ଆଜି(ରବିବାର) ସେମାନଙ୍କୁ ଦଳରୁ ବହିଷ୍କୃତ କରାଯାଇଥିବା ଦଳର ରାଜ୍ୟ ସମ୍ପାଦକ କୋଡିୟେରୀ ବାଲକ୍ରିଷ୍ଣନ କହିଛନ୍ତି ।
ଏହାସହ ସେମାନେ ମାଓବାଦୀଙ୍କ ସହିତ କାମ କରୁଥିବାରୁ ଦୁହେଁ ସିପିଆଇ(ଏମ୍)ର କର୍ମୀ ନୁହଁନ୍ତି ବୋଲି ବାଲକ୍ରିଷ୍ଣନ କହିବା ସହ ଦଳ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ବୋଲି ସେ କହିଛନ୍ତି । ଏହି ମନ୍ତବ୍ୟ ସେ ଦଳର ଦୁଇଦିନିଆ ରାଜ୍ୟ କାର୍ଯ୍ୟକାରିଣୀ ବୈଠକ ପରେ କହିଛନ୍ତି ।
ସୂଚନାଥାଉକି, ତାହା ଫାଜଲ ଓ ଆଲନ ସୁହିବ ନାମକ ଦୁଇ ଜଣ ଛାତ୍ର ମାଓବାଦୀଙ୍କ ସହ ଲିଙ୍କ ଥିବା ନେଇ ଗିରଫ ହୋଇଥିଲେ । ତାହା ଫାଜଲ ସାମ୍ବାଦିକତାର ଛାତ୍ର ଥିବାବେଳେ ଆଲନ ସୁହିବ ଓକିଲାତିର ଛାତ୍ର ଥିଲେ । ଏହାସହ ଦୁହେଁ ସିପିଆଇ(ଏମ)ର ମେମ୍ବର ଥିବା ଜଣାପଡିଥିଲା ଯାହାକୁ ନେଇ ଚର୍ଚ୍ଚା ଜୋର ଧରିଥିଲା ।
ସେପଟେ ଏହି ଘଟଣାରେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) କରୁଥିବାବେଳେ ତଦନ୍ତକୁ ସଠିକ୍ ଦିଗରେ ନେବା ପାଇଁ କେରଳ ମୁଖ୍ୟମନ୍ତ୍ରୀ ଏହାକୁ ରାଜ୍ୟ ପୋଲିସକୁ ଦେବାକୁ ଗୃହମନ୍ତ୍ରୀ ଅମିତ ଶାହଙ୍କୁ ଚିଠି ଲେଖିଛନ୍ତି ।
ସୌଜନ୍ୟ: ପିଟିଆଇ
