ନୂଆଦିଲ୍ଲୀ:ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଆଜିଠାରୁ ଆରମ୍ଭ ହେବ ସିରୋଲଜିକାଲ ସର୍ଭେ । କୋରୋନା ମାମଲା ବୃଦ୍ଧିକୁ ଦୃଷ୍ଟିରେ ରଖି ଦିଲ୍ଲୀରେ ଶନିବାର ଠାରୁ ସିରୋଲଜିକାଲ ସର୍ଭେ ଆରମ୍ଭ ହେବ। ଏହି ସର୍ଭେ ମାଧ୍ୟମରେ ଦିଲ୍ଲୀରେ କୋରୋନାର ବ୍ୟାପକ ବିଶ୍ଳେଷଣ କରାଯିବ । ଏଥିସହ ବିଶ୍ୱ ମହାମାରୀର ମୁକାବିଲା ପାଇଁ ଏହା ଏକ ବିସ୍ତୃତ ରଣନୀତି ପ୍ରସ୍ତୁତ କରିବାରେ ମଧ୍ୟ ସହାୟକ ହେବ ।
ଗତ ଜୁନ୍ 21ରେ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହାଙ୍କ ଅଧ୍ଯକ୍ଷତାରେ ହୋଇଥିବା ବୈଠକରେ ଦିଲ୍ଲୀ କୋରୋନା ସ୍ଥିତିକୁ ନେଇ ନିଆଯାଇଥିବା ନିଷ୍ପତ୍ତିକୁ ଗତ ଜୁନ୍ 25ରେ କେନ୍ଦ୍ର ଗୃହ ସଚିବ ସମୀକ୍ଷା କରିଥିଲେ । ଏହି ବୈଠକରେ ଦିଲ୍ଲୀ ମୁଖ୍ୟ ଶାସନ ସଚିବ ତଥା ସ୍ୱାସ୍ଥ୍ୟ ସଚିବ ତଥା ଡ.ଭିକେ ପାଲ, ଏମ୍ସ ନିର୍ଦ୍ଦେଶକ ଡ. ରଣଦୀପ ଗୁଲେରିଆ ଏବଂ ଆଇସିଏମଆରର ମହାନିର୍ଦ୍ଦେଶକ ବଳରାମ ଭାର୍ଗବ ଯୋଗ ଦେଇଥିଲେ। ।
ଗୃହ ମନ୍ତ୍ରଣାଳୟର ମୁଖପାତ୍ର ଟ୍ୱିଟ୍ କରି କହିଛନ୍ତି, ଗୃହମନ୍ତ୍ରୀ ଅମିତ ଶାହାଙ୍କ ନିର୍ଦ୍ଦେଶ ଅନୁଯାୟୀ ଦିଲ୍ଲୀରେ ଏକ ସିରୋଲଜିକାଲ ସର୍ଭେ ଉପରେ ଆଲୋଚନା କରାଯାଇଥିଲା । ଯାହା ଏନସିଡିସି ଏବଂ ଦିଲ୍ଲୀ ସରକାର ମିଳିତ ଭାବେ କରିବେ।
ତେବେ ଗୃହ ମନ୍ତ୍ରଣାଳୟ ପୂର୍ବରୁ କହିଥିଲେ ଯେ, ଜୁନ୍ 27ରୁ ଜୁଲାଇ 10 ପର୍ଯ୍ୟନ୍ତ ଦିଲ୍ଲୀରେ ପ୍ରାୟ 20 ହଜାର ଲୋକଙ୍କୁ ଯାଞ୍ଚ କରାଯିବ। ତେବେ ସିରୋଲୋଜୀ(ଆଣ୍ଟିବଡି) ଯାଞ୍ଚ ସମ୍ପ୍ରଦାୟ ମଧ୍ୟରେ ନଜର ରଖିବା ପାଇଁ ପରୀକ୍ଷା କରାଯାଏ । ଏହା କୋରୋନା ଭାଇରସ ପ୍ରତିରୋଧ ବିଷୟରେ ସୂଚନା ପ୍ରଦାନ କରିପାରିବ ।
