ଗୌହାଟୀ: ସମାନ ଉଚ୍ଚାରଣର ନାଁକୁ ନେଇ ହଟହଟା ହେଲେ ହସ୍ପିଟାଲ କର୍ତ୍ତୃପକ୍ଷ । ଭୁଲରେ କୋରୋନାରୁ ସୁସ୍ଥ ହୋଇଥିବା ରୋଗୀଙ୍କ ବଦଳରେ ଚିକିତ୍ସିତ ହେଉଥିବା ରୋଗୀଙ୍କୁ ଘରକୁ ପଠାଇଦିଆଯାଇଥିଲା । ପରେ ଭୁଲ ଜାଣିପାରି ତାଙ୍କୁ ଫେରାଇ ଅଣାଗଲା । ଆସାମର ଡାରଙ୍ଗ ଜିଲ୍ଲାରେ ଦେଖିବାକୁ ମିଳିଛି ଏଭଳି ଅଭାବନୀୟ ଘଟଣା ।
ସୂଚନା ମୁତାବକ, ଆସାମ ଡାରଙ୍ଗ ଜିଲ୍ଲାର ସିଭିଲ ହସ୍ପିଟାଲରେ 2 ଦିନ ତଳଏ 14 ଜଣ କୋରୋନା ଆକ୍ରାନ୍ତ ସୁସ୍ଥ ହୋଇଥିଲେ । ସେମାନଙ୍କୁ ଡିସ୍ଚାର୍ଜ ଦେବାପାଇଁ ସେମାନଙ୍କ ତାଲିକା ହସ୍ପିଟାଲ ପକ୍ଷରୁ ଜାରି କରାଯାଇଥିଲା । ତେବେ ତାଲିକାରେ ହମିଦ୍ ଅଲ୍ଲୀ ସୁସ୍ଥ ହୋଇଥିବା ଦର୍ଶାଯାଇଥିବା ବେଳେ ମେଡିକାଲ କର୍ତ୍ତୃପକ୍ଷ ଭୁଲବଶତଃ ସମାନ ନାମ ଉଚ୍ଚାରଣ ହେଉଥିବା ହନିଫ ଅଲ୍ଲୀଙ୍କୁ ଘରକୁ ପଠାଇଦେଇଥିଲେ । ହନିଫ ଅଲ୍ଲୀ ସେହି ଡାକ୍ତରଖାନାରେ କୋରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ ।
ତେବେ ଘଟଣା ସମ୍ପର୍କରେ ଅବଗତ ହେବାପରେ ହସ୍ପିଟାଲ ପକ୍ଷରୁ ତୁରନ୍ତ ଏହି ଭୁଲକୁ ସୁଧାରି ଦିଆଯାଇଥିଲା । ହସ୍ପିଟାଲ କର୍ତ୍ତୃପକ୍ଷ ତୁରନ୍ତ ଆମ୍ବୁଲାନ୍ସ ପଠାଇ ହନିଫ ଅଲ୍ଲୀଙ୍କୁ ମେଡିକାଲକୁ ଫେରାଇ ଆଣିଥିଲେ । ତେବେ ସୌଭାଗ୍ୟବଶତଃ ହନିଫ ଅଲ୍ଲୀଙ୍କ ରିପୋର୍ଟ ମଧ୍ୟ ନେଗେଟିଭ ଆସିଥିଲା । ଏହାପରେ ତାଙ୍କୁ ମଧ୍ୟ ହସ୍ପିଟାଲରୁ ଛୁଟି ଦିଆଯାଇଥିବା ମେଡିକାଲ କର୍ତ୍ତୃପକ୍ଷ କହିଛନ୍ତି ।
