ଭୋପାଳ: ମଧ୍ୟପ୍ରଦେଶ ସରକାର ଦାବି କରିଛନ୍ତି ଯେ, କୋରୋନା ଜୀବାଣୁ ମୁକାବିଲା କରିବାରେ ସାହାଯ୍ୟ କରୁଥିବା କୋଭିଡ -19 ଯୋଦ୍ଧାମାନଙ୍କ ପାଇଁ ରାଜ୍ୟରେ ପ୍ରତିଦିନ 12 ହଜାର ପିପିଏ କିଟ୍ ପ୍ରସ୍ତୁତ କରାଯାଉ ଥିବାବେଳେ ଦୈନିକ 10 ହଜାର ପିପିଏ କିଟର ଆବଶ୍ୟକତା ରହିଛି । ମଧ୍ୟପ୍ରଦେଶର ଲୋକସମ୍ପର୍କ ବିଭାଗ ଏକ ବିଜ୍ଞପ୍ତିରେ କହିଛି, "ପିପିଏ କିଟ୍ ରାଜ୍ୟରେ ଆବଶ୍ୟକତା ଠାରୁ ଅଧିକ ପରିମାଣରେ ଉପଲବ୍ଧ ଅଛି । ରାଜ୍ୟରେ ଦୈନିକ 10 ହଜାର ପିପିଏ କିଟ୍ ଆବଶ୍ୟକ ହେଉଥିବାବେଳେ ପ୍ରତିଦିନ 12 ହଜାର କିଟ୍ ତିଆରି କରାଯାଉଛି"।
ମଧ୍ୟପ୍ରଦେଶ ଶିଳ୍ପ ବିକାଶ କେନ୍ଦ୍ରର ପରିଚାଳନା ନିର୍ଦ୍ଦେଶକ କୁମାର ପୁରୁଷୋତ୍ତମ କହିଛନ୍ତି ଯେ ଏପର୍ଯ୍ୟନ୍ତ ଅଢେଇ ଲକ୍ଷ ପିପିଇ କିଟ୍ ପ୍ରସ୍ତୁତ କରାଯାଇଛି । ସେଥିମଧ୍ୟରୁ ପ୍ରାୟ 75 ହଜାର କିଟ୍ ଇନ୍ଦୋର ଏବଂ ଭୋପାଳକୁ ପଠାଯାଇଛି । ସୂଚନା ଦେଇଛନ୍ତି ଯେ, ଇନ୍ଦୋରର ବହୁ ସାହାଯ୍ୟକାରୀ ଲୋକେ ବହୁ ସଂଖ୍ୟାରେ ପିପିଏ କିଟ୍ ଯୋଗାଇବାକୁ ଆଗେଇ ଆସୁଛନ୍ତି।
ପୁରୁଷୋତ୍ତମ ଆହୁରି କହିଛନ୍ତି ଯେ, ଭୋପାଳ ଏବଂ ଇନ୍ଦୋରରେ ପ୍ରାୟ 40 ହଜାର ପିପିଇ କିଟ୍ ଷ୍ଟକରେ ରହିଛି । ଆବଶ୍ୟକତା ଅନୁଯାୟୀ ଏଗୁଡିକ ବିଭିନ୍ନ ଜିଲ୍ଲାକୁ ପଠାଯାଉଛି। ମଧ୍ୟପ୍ରଦେଶରେ ଏପର୍ଯ୍ୟନ୍ତ 2 ହଜାରରୁ ଉର୍ଦ୍ଧ୍ବ ଲୋକ କୋରୋନାରେ ସଂକ୍ରମିତ ହୋଇଥିବା ନିଶ୍ଚିତ ହୋଇଛି। ଏଥିମଧ୍ୟରୁ 103 ଜଣ ଲୋକ ଏପର୍ଯ୍ୟନ୍ତ ପ୍ରାଣ ହରାଇଛନ୍ତି।
