ଭୋପାଳ: କୋରୋନା ନେଲା ଆଉ ଏକ ମୁଣ୍ଡ । ମଧ୍ୟପ୍ରଦେଶର ଦେୱାସ ଜିଲ୍ଲା ହାତପିପାଲ୍ୟା ଟାଉନରେ ଜଣେ 50 ବର୍ଷୀୟ ସାମ୍ବାଦିକଙ୍କର ଶୁକ୍ରବାର ମୃତ୍ୟୁ ହୋଇଥିବା ଜଣା ପଡିଛି । ସମ୍ପୃକ୍ତ ବ୍ୟକ୍ତି ଜଣଙ୍କ ଏକ ଦୈନିକ ହିନ୍ଦୀ ଖବରକାଗଜ ପାଇଁ କାର୍ଯ୍ୟରତ ଥିଲେ । ଏହା ସ୍ଥାନୀୟ ଅଞ୍ଚଳରେ ପ୍ରଥମ କୋରୋନା ମୃତ୍ୟୁ ବୋଲି ଜଣା ପଡିଛି । ସେପଟେ ବର୍ତ୍ତମାନ ସମ୍ପୃକ୍ତ ଅଞ୍ଚଳରେ ଅନ୍ୟ 2 ବ୍ୟକ୍ତି କୋରୋନା ପଜିଟିଭ ରହିଥିବାର ସୂଚନା ରହିଛି ।
ଖବର ମୁତାବକ ମୃତ ବ୍ୟକ୍ତି ଜଣଙ୍କ ତିନି ଚାରି ଦିନ ତଳେ ଜ୍ବରରେ ପୀଡିତ ଥିବା ବେଳେ ବୁଧବାର ରାତିରେ କୋରୋନା ପଜିଟିଭ ଥିବା ଜଣା ପଡିଥିଲା । ଏହା ଜଣା ପଡିବା ପରେ ତାଙ୍କୁ ତୁରନ୍ତ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ଗୁରୁବାର ତାଙ୍କର ଅବସ୍ଥା ସଙ୍କଟାପନ୍ନ ହୋଇ ପଡିଥିଲା । ତେଣୁ ତାଙ୍କୁ ତୁରନ୍ତ ନିକଟସ୍ଥ ଏକ ଘରୋଇ ଡାକ୍ତରଖାନାର କ୍ବାରେଣ୍ଟାଇନ ସେଣ୍ଟରକୁ ସ୍ଥାନାନ୍ତର କରାଯାଇଥିଲା। ହେଲେ ଶୁକ୍ରବାର ତାଙ୍କର ମୃତ୍ୟୁ ହୋଇଛି ।
ତେବେ ଜିଲ୍ଲାରେ 62ଟି ସ୍ବାବ ନମୂନା ପରୀକ୍ଷା କରାଯାଇଥିବା ବେଳେ ସେଥିମଧ୍ୟରୁ 3 ଟି ପଜିଟିଭ ରହିଥିଲା । ଯେଉଁଥିରୁ ଜଣଙ୍କର ଶୁକ୍ରବାର ମୃତ୍ୟୁ ହୋଇଛି ଓ ଅନ୍ୟ 2 ଏବେ ବି ଚିକିତ୍ସିତ ଅଛନ୍ତି । ଏଥିସହ ମଧ୍ୟପ୍ରଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା 426ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 33ରେ ପହଞ୍ଚିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
