ଜୟପୁର: କୋରୋନା କାୟାରେ ସାରା ବିଶ୍ବ ! ସାଧାରଣ ଜୀବନ ଠାରୁ ଆରମ୍ଭ କରି ସାମାଜିକ ସମ୍ପର୍କ ଏଵେ ବିପନ୍ନ, ବିଚ୍ଛିନ୍ନ ! ଦୀର୍ଘ ମାସେ ଧରି ଲୋକେ ନିଜକୁ ତାଲାବନ୍ଦ କରି ରଖିଛନ୍ତି।ଯାହାଫଳରେ ଅତ୍ୟାଧୁନିକତାର ସାମାଜିକ ଚଳଣୀ ଯେମିତି ଯନ୍ତ୍ରଣା-ଜର୍ଜରିତ। କ୍ଷଣିକରେ ଅସମ୍ଭବକୁ ସମ୍ଭବ କରିପାରୁଥିବା ମଣିଷ, ସାମାନ୍ୟ ଭୂତାଣୁ ଲଢେଇରେ ଧରାଶାୟୀ! ଶକ୍ତିଶାଳୀ ରାଷ୍ଟ୍ର ଗୁଡିକର ଅର୍ଥନୈତିକ ମେରୁଦଣ୍ଡ ଭାଙ୍ଗିଗଲାଣି। ରାଜନୈତିକ ପୃଷ୍ଠଭୂମି ବି ଦୋହଲିଲାଣି। ନିରୁପାୟ ମଣିଷ ସମାଜ ଏଵେ ଭ୍ୟାକ୍ସିନ୍ ଅପେକ୍ଷାରେ ! ତେବେ ଏହି ଅଦୃଶ୍ୟ ମହାମାରୀ ସହ ବିନା ଅସ୍ତ୍ରରେ ଲଢ଼ିବା ପାଇଁ କେବଳ ଟିକିଏ ସତର୍କତା,ସଚେତନତା ଓ ସଫା ସୁତୁରା ରହିବା ଜରୁରୀ।
ତେବେ ଏହି ଭୟଙ୍କର ମହାମାରୀର ପ୍ରତିକାର ଓ ପଦକ୍ଷେପ ସମ୍ପର୍କରେ ଲୋକଙ୍କ ମନରେ ଥିବା କିଛି ପ୍ରଶ୍ନର ଉତ୍ତର ରଖିଛନ୍ତି ପବ୍ଲିକ୍ ହେଲଥ୍ ଏକ୍ସପର୍ଟ ଆଣ୍ଡ୍ ସୋସିଆଲ ସାଇଣ୍ଟିଷ୍ଟ ଡକ୍ଟର ଲଳିତ ମୋହନ ନାୟକ।
ସାମାଜିକ ଦୂରତା, ମାସ୍କ, ଲକ୍ଡାଉନ ଛଡା ଆଉ କିଛି ବିକଳ୍ପ ଅଛି କି ?
ଉ- କେବଳ ମାସ୍କ ପିନ୍ଧିବା ଓ ଘରେ ରହିବା ଛଡା ଆମକୁ ହାତ ଗ୍ଲୋବସ୍ ପିନ୍ଧିବା ଜରୁରୀ। ଘରୁ ପଦାକୁ ବାହାରିଲେ ହାତରେ ଗ୍ଲୋବସ ପିନ୍ଧି ବାହାରିବା ଉଚିତ୍ । ସେହିପରି ମାସ୍କ ପରି ହାତ ଗ୍ଲୋବସ୍ ମଧ୍ୟ ଆମେ ନିଜେ ତିଆରି କରି ଏହାକୁ ବ୍ୟବହାର କରି ପାରିବା ।
ବିନା ଲକ୍ଷଣରେ ବି ଆସୁଛି କୋରୋନା ପଜେଟିଭ, ଏହାକୁ ନେଇ କଣ କହିବେ ?
ଉ- ଯଦି ଆମେ ଆଇସିଏମଆର ତଥ୍ୟକୁ ଦେଖିବା ତେବେ ପ୍ରାୟ 70 ପ୍ରତିଶତ ଲୋକଙ୍କ ନିକଟରେ ଲକ୍ଷଣ ଦେଖାଯାଉନାହିଁ । ତେବେ ବିନା ଟେଷ୍ଟରେ ଏହା ଆମେ ଜାଣିପାରିବା ନାହିଁ । କିନ୍ତୁ ଏହା ଭାବି ଆମେ ଲୋକଙ୍କୁ ଖରାପ ନଜରରେ ଦେଖି ପାରିବା ନାହିଁ । ଲୋକଙ୍କଠୁ ସାମାଜିକ ଦୂରତା ବଜାୟ ରଖିବା ଏବଂ WHO ନିର୍ଦ୍ଦେଶାବଳୀମାନୀ ଚଳିବା ।
ଗୋଷ୍ଠୀ ସଂକ୍ରମଣ ରୋକିବା ପାଇଁ କଣ କରିବା ଦରକାର ?
ଉ-ଗୋଷ୍ଠୀ ସଂକ୍ରମଣ ରୋକିବା ବହୁତ ଜରୁରୀ ହୋଇପଡିଛି । କାରଣ ଗାଁ ଗାଁକୁ ଏହି ଭୂତାଣୁ ନ ବ୍ୟାପିବା ଦରକାର । କିନ୍ତୁ ଓଡିଶା ସରକାର ବହୁତ ଭଲ ପଦକ୍ଷେପ ନେଇଛନ୍ତି । ସରପଞ୍ଚଙ୍କୁ ଶପଥ ଦେଇଛନ୍ତି ତଥାପି ସରକାରଙ୍କୁ ଏଥିପ୍ରତି ଦୃଷ୍ଟି ଦେବା ଦରକାର ।
ଭଦ୍ରକ, ଯାଜପୁର ଓ ବାଲେଶ୍ବର ଭଳି ରେଡଜୋନକୁ କୋରୋନା ମୁକ୍ତ ପାଇଁ କଣ ରହିବ ସରକାରଙ୍କ ଷ୍ଟ୍ରାଟେର୍ଜୀ ?
ଉ-ପ୍ରଥମତଃ କମ୍ୟୁନିଟି ମିଡିଆକୁ ଆଗକୁ ଆସିବା ଦରକାର । କାରଣ ଗ୍ରାମାଞ୍ଚଳ ଲୋକମାନଙ୍କର ଏନେଇ ଭୟ ରହିଛି । ତେଣୁ ଗଣମାଧ୍ୟମ ଆଗକୁ ଆସି ସଚେତନ କରିବା ଉଚିତ୍ । ଏହାସହ ସରକାର ଆଶା ଓ ଅଙ୍ଗନୱାଡି କର୍ମୀ ମାନଙ୍କୁ ଟ୍ରେନିଂ ଦେବା ଉଚିତ୍ କାରଣ ସେମାନେ ହିଁ ପ୍ରକୃତରେ ଘରକୁ ଘର ଯାଇ ଲୋକଙ୍କୁ ସଚେତନ କରିପାରିବେ ।
କୋରୋନାରୁ ମୁକ୍ତି ପାଇଥିବା ଲୋକମାନେ ସମାଜ ପାଇଁ କଣ କରିବା ଦରକାର ?
ଉ- ସେମାନଙ୍କୁ ଆମେ କୋରୋନା ଚମ୍ପିଆନ୍ସ ନାମରେ ମଧ୍ୟ ଡାକିପାରିବା । ଏମାନଙ୍କର ଭୂମିକା ବହୁତ ଗୁରୁତ୍ବପୂର୍ଣ୍ଣ । କାରଣ ଏମାନେ ଥରେ ସେ ରୋଗକୁ ଜିତି ଆସିଛନ୍ତି । ତେଣୁ ମିଡିଆ ସେମାନଙ୍କ ଅନୁଭବକୁ ନେଇ ଲୋକଙ୍କ ପାଖରେ ପହଞ୍ଚାଇବା ଦରକାର । ଫଳରେ ଲୋକେ ଭୟଭୀତ ହେବେ ନାହିଁ ।
ରୋଗପ୍ରତିରୋଧକ ଶକ୍ତି ବଢାଇବା କିପରି ?
ଉ- ଆମେ ଘରେ ରହି ଏହା ବୃଦ୍ଧି କରିପାରିବା । ସରକାରଙ୍କ(ଆୟୁଷ) ଗାଇଡ୍ଲାଇନ୍କୁ ମାନିବା । ପୁଷ୍ଟିକର ଖାଦ୍ୟ ଖାଇବା ଏବଂ ଗରମ ଗରମ ଖାଦ୍ୟ ଖାଇବା ଜରୁରୀ । ଏହାସହ ନିତିଦିନ ବ୍ୟାୟାମ କରିବା ଜରୁରୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
