ନୂଆଦିଲ୍ଲୀ: ସ୍ୱାସ୍ଥ୍ୟ ମନ୍ତ୍ରଣାଳୟ କୋରୋନା ଭାଇରସର ଲକ୍ଷଣ ତାଲିକାରେ ଘ୍ରାଣ ଶକ୍ତି ନଷ୍ଟ ହେବା କିମ୍ବା ଖାଦ୍ୟର ସ୍ୱାଦ ନଜାଣିପାରିବାକୁ ତାଲିକାଭୁକ୍ତ କରିଛି । ବର୍ତ୍ତମାନ କୋରୋନା ପରୀକ୍ଷା କରାଇବାରେ 13ଟି କ୍ଲିନିକାଲ ଲକ୍ଷଣ ରହିଛି । ଯାହା ଗତ ମାସରେ ସଂଶୋଧିତ ହୋଇଥିଲା ।
ଏହି ଲକ୍ଷଣଗୁଡ଼ିକରେ ଜ୍ୱର, କାଶ, ଡାଏରିଆ, ବାନ୍ତି, ପେଟ ଯନ୍ତ୍ରଣା, ନିଃଶ୍ବାସ ପ୍ରଶ୍ବାସ ନେବାରେ ଅସୁବିଧା, ଶରୀର ଯନ୍ତ୍ରଣା, ଗଳା ଯନ୍ତ୍ରଣା, ଛାତି ଯନ୍ତ୍ରଣା ଏବଂ ନାକରୁ ପାଣିବାହାରିବା ଇତ୍ୟାଦି । ଏଥି ମଧ୍ୟରୁ ଗୋଟିଏ କିମ୍ବା 2ଟି ଲକ୍ଷଣ ଥିବା ଲୋକଙ୍କୁ କୋରୋନା ପରୀକ୍ଷା ପାଇଁ ଅନୁମତି ଦିଆଯାଇଛି । ବର୍ତ୍ତମାନ, ତାଲିକାରେ ସ୍ୱାଦ ବାରି ନପାରିବା ଏବା ଘ୍ରାଣ ଶକ୍ତି ହରାଇବାକୁ ଯୋଗ କରିବା ପରେ, ବର୍ତ୍ତମାନ ପରୀକ୍ଷା କରିବାର 15ଟି କ୍ଲିନିକାଲ ଲକ୍ଷଣ ରହିଛି ।
ଆମେରିକାର ନ୍ୟାସନାଲ ଇନଷ୍ଟିଚ୍ୟୁଟ ଅଫ ପବ୍ଲିକ ହେଲଥ ସେଣ୍ଟର ଫର ରୋଗ ନିୟନ୍ତ୍ରଣ ଏବଂ ପ୍ରତିରୋଧ କେନ୍ଦ୍ର (ସିଡିସି) ମେ ମାସ ଆରମ୍ଭରେ କୋଭିଡ-19ର ନୂତନ ଲକ୍ଷଣକୁ ଅନ୍ତର୍ଭୁକ୍ତ କରିଥିଲା। କୋଭିଡ-19 ପାଇଁ ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ଦ୍ବାରା ମେ 18ରେ ପ୍ରକାଶିତ ସଂଶୋଧିତ ଅନୁସନ୍ଧାନ ରଣନୀତି ମୁତାବିକ ଇନଫ୍ଲୁଏଞ୍ଜା ଭଳି ରୋଗର ଲକ୍ଷଣ ସହିତ ଅନ୍ୟ ରାଜ୍ୟରୁ ଫେରି ଆସିଥିବା ପ୍ରବାସୀ ଭାରତୀୟଙ୍କୁ 7 ଦିନ ଭିତରେ ଯାଞ୍ଚ କରିବାକୁ ପଡିବ ।
ଆଇସିଏମଆର କହିଛି ଯେ, ଡାକ୍ତରଖାନାରେ ଭର୍ତ୍ତି ହୋଇଥିବା ସଂକ୍ରମିତ ଏବଂ କୋଭିଡ-19 ରୋକିବା ପାଇଁ ଫ୍ରଣ୍ଟଲାଇନରେ କାର୍ଯ୍ୟ କରୁଥିବା ସ୍ୱାସ୍ଥ୍ୟ କର୍ମୀଙ୍କ ଠାରେ ଆଇଏଲଆଇ ଭଳି ଲକ୍ଷଣ ବିକଶିତ ହେଲେ ସେମାନଙ୍କର ଆରଟି- ପିସିଆର ପରୀକ୍ଷା ମାଧ୍ୟମରେ କୋଭିଡ-19 ପାଇଁ ମଧ୍ୟ ସ୍କ୍ରିନିଂ କରାଯିବ । ଏହାସହ ଏହା ମଧ୍ୟ କୁହାଯାଇଛି ଯେ କୌଣସି ସଂକ୍ରମିତଙ୍କ ସଂସ୍ପର୍ଶରେ ଆସୁଥିବା ବ୍ୟକ୍ତି, ଯେଉଁମାନଙ୍କ ଠାରେ ଲକ୍ଷଣ ଦେଖାଯାଏ ନାହିଁ ଏବଂ ଅଧିକ ବିପଜ୍ଜନକ ବ୍ୟକ୍ତିଙ୍କ ସଂସ୍ପର୍ଶରେ ଆସିବା ପରେ ସେମାନଙ୍କୁ ପାଞ୍ଚରୁ 10 ଦିନ ମଧ୍ୟରେ ଥରେ ପରୀକ୍ଷା କରିବାକୁ ପଡିବ ।
