ବେଙ୍ଗାଲୁରୁ: କର୍ଣ୍ଣାଟକରେ କଂଗ୍ରେସ-ଜେଡିଏସ ମେଣ୍ଟ ସରକାରର ପତନ ପରେ ବିଜେପିକୁ ସମାଲୋଚନା କରିଛନ୍ତି କଂଗ୍ରେସ ସମେତ ପ୍ରମୁଖ ବିରୋଧୀ ଦଳ । ରାଜ୍ୟରେ ଲୋଭର ବିଜୟ ହୋଇଛି ବୋଲି ନେତା ରାହୁଲ ଗାନ୍ଧୀ କହିଛନ୍ତି । ସେପଟେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ମଧ୍ୟ ଏହି ମାମଲାରେ ପ୍ରତିକ୍ରିୟା ଦେଇ ବିଜେପି ଉପରେ ବର୍ଷିଛନ୍ତି ।
ରାହୁଲ ଗାନ୍ଧୀ ଟ୍ବିଟ କରି କହିଛନ୍ତି, କର୍ଣ୍ଣାଟକରେ କଂଗ୍ରେସ-ଜେଡିଏସ ମେଣ୍ଟ ସରକାର ଗଠନ ହେବାର ପ୍ରଥମ ଦିନରୁ ହିଁ ବିଜେପି ଏହାକୁ ଟାର୍ଗେଟ କରିଥିଲା । ଯେଉଁଲୋକମାନେ ନିଜ ଶାସନ କ୍ଷମତା ରାସ୍ତାରେ ମେଣ୍ଟ ସରକାରକୁ କଣ୍ଟା ଭଳି ଦେଖୁଥିଲେ ସେମାନେ ଆଜି ପ୍ରଲୋଭନ ଦେଖାଇ ବିଜୟୀ ହୋଇଛନ୍ତି । ଏହା ଲୋକତନ୍ତ୍ର, ସଚ୍ଚୋଟତା ଓ କର୍ଣ୍ଣାଟକ ଜନତାଙ୍କର ପରାଜୟ ବୋଲି ସେ କହିଛନ୍ତି ।
ସେହିପରି ପ୍ରିୟଙ୍କା ଗାନ୍ଧୀ ମଧ୍ୟ ଏନେଇ ବିଜେପିକୁ ଟାର୍ଗେଟ କରି କହିଛନ୍ତି, ସବୁ ଜିନିଷ କିଣାବିକାରେ ହୋଇପାରେ ନାହିଁ । ସବୁ ଜିନିଷକୁ ନିଲାମ କରାଯାଇ ପାରିବ ନାହିଁ । ପ୍ରତ୍ୟେକ ମିଛର ପର୍ଦ୍ଦାଫାଶ ହୋଇଥାଏ । ଏହି କଥା ବିଜେପି ଦିନେ ନା ଦିନେ ବୁଝିବ । ସେହିଦିନ ଯାଏଁ ଆମ ଦେଶର ଜନତାଙ୍କୁ ଅପେକ୍ଷା କରିବାକୁ ପଡ଼ିବ ବୋଲି ସେ କହିଛନ୍ତି ।
ସେପଟେ ଜମ୍ମୁକାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ନେତ୍ରୀ ମେହବୁବା ମୁଫ୍ତି ଏହାକୁ ଲୋକତନ୍ତ୍ରର କଳାଦିନ ବୋଲି କହିଛନ୍ତି । କର୍ଣ୍ଣାଟକ ବିଧାୟକଙ୍କୁ ମୁମ୍ବାଇରେ ରହିବା ପାଇଁ ଟଙ୍କା ଦିଆଗଲା । ଯାହା ବିଶ୍ବର ସବୁଠୁ ବଡ ଲୋକତନ୍ତ୍ରର ଦେଶ ପାଇଁ ଠିକ୍ ନୁହେଁ ବୋଲି ସେ କହିଛନ୍ତି । ସେହିପରି ଓମାର ଅବ୍ଦୁଲା ମଧ୍ୟ ଏହାକୁ ଲୋକତନ୍ତ୍ରର ହତ୍ୟା ବୋଲି କହିଛନ୍ତି ।
ଅନ୍ୟପକ୍ଷରେ କର୍ଣ୍ଣାଟକର ଏକମାତ୍ର ବହୁଜନ ସମାଜବାଦୀ ପାର୍ଟି ବିଧାୟକ ଏନ୍ ମହେଶ ଆସ୍ଥା ଭୋଟରେ ଉପସ୍ଥିତ ନ ହେବାରୁ ତାଙ୍କୁ ଦଳରୁ ବହିଷ୍କାର କରାଯାଇଛି । ମଙ୍ଗଳବାର ଗୃହରେ ଉପସ୍ଥିତ ରହି କୁମାରସ୍ବାମୀଙ୍କ ସପକ୍ଷରେ ଭୋଟ ଦେବାକୁ ବିଏସପି ସୁପ୍ରିମୋ ମାୟାବତୀ ମହେଶଙ୍କୁ କଡା ନିର୍ଦ୍ଦେଶ ଦେଇଥିଲେ । କିନ୍ତୁ ସେ ଗୃହରେ ଯୋଗଦେଇନଥିବା ଖବର ପାଇବା ମାତ୍ରେ ମାୟାବତୀ ଦୃଢ କାର୍ଯ୍ୟାନୁଷ୍ଠାନ ସ୍ବରୁପ ମହେଶଙ୍କୁ ଦଳରୁ ବିଦା କରାଯାଇଛି ।
ସୂଚନାଯୋଗ୍ୟ ଯେ, ଏଚଡି କୁମାରସ୍ବାମୀଙ୍କ ସରକାର ମଙ୍ଗଳବାର ବିଧାନସଭାରେ ସଂଖ୍ୟାଗରିଷ୍ଠତା ପ୍ରମାଣ କରିବାରେ ବିଫଳ ହୋଇଥିଲା । ଆସ୍ଥା ଭୋଟରେ ସରକାରଙ୍କ ପକ୍ଷରେ ୯୯ ଭୋଟ ଓ ବିଜେପି ସପକ୍ଷରେ ୧୦୫ ଜଣ ବିଧାୟକ ଭୋଟ ଦେଇଥିଲେ ।
