ଗୌହାଟି: ନାଗରିକତା ସଂଶୋଧନ ଆଇନ୍ ବିରୋଧରେ ପୂର୍ବୋତ୍ତର ରାଜ୍ୟ ସମେତ ଦେଶର ଭିନ୍ନ ଭିନ୍ନ ପ୍ରାନ୍ତରେ ଆନ୍ଦୋଳନର ନିଆଁ ଜଳୁଛି । ଆସାମ ଏବଂ ତ୍ରିପୁରାରେ ଏବେ ସୁଦ୍ଧା ସେନା ମୁତୟନ ଥିବାବେଳେ କର୍ଫ୍ୟୁ ଜାରି ରହିଛି । ସେପଟେ ଆସାମରେ ସ୍ଥିତିରେ ସାମାନ୍ୟ ସୁଧୁରିଥିବା ଦେଖାଦେଇଛି । ଏହାକୁ ଦୃଷ୍ଟିରେ ରଖି ଗୌହାଟିରେ ଶନିବାର ସକାଳ 9ଟାରୁ ଅପରାହ୍ନ 4ଟା ପର୍ଯ୍ୟନ୍ତ କର୍ଫ୍ୟୁ କୋହଳ କରାଯାଇଛି । ସେହିପରି ଦେବ୍ରୁଗଡରେ ମଧ୍ୟ ସକାଳ 8ଟାରୁ ଅପରାହ୍ନ 2ଟା ପର୍ଯ୍ୟନ୍ତ କର୍ଫ୍ୟୁ କୋହଳ କରାଯାଇଛି । କିନ୍ତୁ ମୋବାଇଲ ଇଣ୍ଟରନେଟ ଏବଂ ମେସେଜିଂ ସେବା ଉପରେ କଟକଣା ଲାଗୁ ରହିଛି ।
ଏହା ପୂର୍ବରୁ ଶୁକ୍ରବାର ବିଭିନ୍ନ ସ୍ଥାନରେ ହିଂସା ଦେଖିବାକୁ ମିଳିଥିଲା । କର୍ଫ୍ୟୁ ବିରୋଧରେ ଅଖିଳ ଆସାମ ଷ୍ଟୁଡେଣ୍ଟ ୟୁନିୟନ୍ (ଏଏଏସ୍ୟୁ) ଶୁକ୍ରବାର ଅନଶନ କରିଥିଲା । ଯେଉଁଥିରେ ଆସାମର ଛାତ୍ରୀଛାତ୍ର, ବରିଷ୍ଠ ନାଗରିକ, କଳାକାର ଓ ଶିକ୍ଷକମାନେ ସାମିଲ ହୋଇଥିଲେ । ସେପଟେ ହିଂସା ପ୍ରଦର୍ଶନକୁ ଦୃଷ୍ଟିରେ ରଖି ଫ୍ରାନ୍ସ, ଆମେରିକା ଏବଂ ବ୍ରିଟେନ ନିଜ ନିଜ ନାଗରିକଙ୍କୁ ଆଡଭାଇଜରି ଜାରି କରିଛନ୍ତି । ସେମାନଙ୍କୁ ଆସାମ ନଯିବା ପାଇଁ ଆଡଭାଇଜରିରେ କୁହାଯାଇଛି ।
ସୂଚନାଯୋଗ୍ୟ ଯେ, ନାଗରିକତା ସଂଶୋଧନ ବିଲ୍ ସଂସଦରେ ପାରିତ ହେବା ପରେ ରାଷ୍ଟ୍ରପତି ରାମନାଥ କୋବିନ୍ଦ ମଧ୍ୟ ଏଥିରେ ସ୍ବାକ୍ଷର କରିଛନ୍ତି । ଏହି ବିଲ୍ ଏବେ ଆଇନରେ ପରିଣତ ହୋଇଛି। ତେବେ ଏହାକୁ ବିରୋଧ କରି ଉତ୍ତର-ପୂର୍ବାଞ୍ଚଳ ରାଜ୍ୟଗୁଡ଼ିକ ପ୍ରଦର୍ଶନ କରୁଛନ୍ତି ।
