ହାଇଦ୍ରାବାଦ: ସରକାରୀ ନିର୍ଦ୍ଦେଶରେ ପରିଚାଳିତ ତଥା କଟକଣା ଲଗାଉଥିବା ଚାଇନିଜ ସୋସିଆଲ ମିଡିଆରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଟ୍ବିଟକୁ ଶନିବାର ଡିଲିଟ କରାଯାଇଥିବା ଜଣା ପଡିଛି । ଭାରତରେ ବୟକଟ୍ ଚାଇନିଜ ପ୍ରଡକ୍ଟର ନାରା ଜୋର ଧରିଥିବା ବେଳେ ଅପରପାର୍ଶ୍ବରେ ଚୀନରେ ମୋଦିଙ୍କ ଟ୍ବିଟକୁ ଡିଲିଟ କରିବା ପ୍ରସଙ୍ଗ ଏବେ ଚର୍ଚ୍ଚାର ବିନ୍ଦୁ ପାଲଟିଛି ।
ସୂଚନା ଅନୁଯାୟୀ ଭାରତ-ଚୀନ ସୀମା ସଂଘର୍ଷକୁ ନେଇ ପ୍ରଧାନମନ୍ତ୍ରୀ ମୋଦି କରିଥିବା ଚ୍ବିଟକୁ ଚାଇନିଜ ସୋସିଆଲ ମିଡିଆରେ ଡିଲିଟ କରାଯାଇଛି । ଜୁନ 18ରେ ମୋଦି କରିଥିବା ଟ୍ବିଟ ଚାଇନିଜ ସୋସିଆଲ ମିଡିଆ ଆପ୍ ୱିଚାଟ୍ରେ ଆକ୍ସେସ ନକରିହେବାରୁ ଏନେଇ ଜଣା ପଡିଥିଲା । ଲଦାଖର ଗଲୱାନ ଉପତ୍ୟକାରେ ଭାରତ ଓ ଚୀନ ମଧ୍ୟରେ ରକ୍ତାକ୍ତ ସଂଘର୍ଷ ହେବା ପରେ ପରେ ମୋଦି ଏହି ଟ୍ବିଟ କରିଥିଲେ । ଏଥିରେ 20 ଜଣ ଯବାନଙ୍କ ଶହୀଦ ହେବା ତଥ୍ୟକୁ ନେଇ ମୋଦି ଟ୍ବିଟ ଯୋଗେ ଜଣାଇଥିଲେ । ହେଲେ ଚୀନ ପକ୍ଷରେ ଏପର୍ଯ୍ୟନ୍ତ ମୃତାହତଙ୍କର କୌଣସି ସ୍ପଷ୍ଟ ସଂଖ୍ୟା ଜଣା ପଡିପାରିନାହିଁ ।
ମୋଦି ନିଜ ଟ୍ବିଟରେ ଏହା ମଧ୍ୟ ଲେଖିଥିଲେ କି ଭାରତ ଶାନ୍ତି ଉପରେ ବିଶ୍ବାସ କରେ ସତ ହେଲେ ଆବଶ୍ୟକସ୍ଥଳେ ଏହା ଶତ୍ରୁଙ୍କୁ କଡା ଜବାବ ଦେବା ମଧ୍ୟ ଭଲ ଭାବେ ଜାଣିଛି । ତେବେ କେବଳ ମୋଦି ନୁହେଁ ବୈଦେଶିକ ବ୍ୟାପାର ମନ୍ତ୍ରୀ ଅନୁରାଗ ଶ୍ରୀବାସ୍ତବଙ୍କ ଭାରତ-ଚୀନ ସମ୍ବନ୍ଧୀୟ ଟ୍ବିଟ ମଧ୍ୟ ଡିଲିଟ କରାଯାଇଥିବା ଜଣା ପଡିଛି । ସେପଟେ ଏହି ଟ୍ବିଟଗୁଡିକୁ ଆକ୍ସେସ କରିବାକୁ ଚେଷ୍ଟା କଲେ ଏହି ନିୟମ ଉଲଂଘନକାରୀ ତଥ୍ୟ ରଖିଥିବାରୁ ଏହାରୁ ବ୍ଲକ କରାଯାଇଥିବା ନୋଟିଫିକେସନ ଦେଖାଉଥିବା ଜଣା ପଡିଛି ।
@IANS
