ମୁମ୍ବାଇ: ମହାରାଷ୍ଟ୍ରରେ ଏବେ ବନ୍ୟା ବିଭିଷିକା । ପ୍ରବଳ ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ତେବେ ବନ୍ୟାର ଏହି ପ୍ରକୋପରୁ ସାଧାରଣ ଲୋକଙ୍କୁ ଦେବଦୂତ ସାଜି ରକ୍ଷା କରୁଛନ୍ତି ଭାରତୀୟ ଯବାନ । ନିଜ ଜୀବନକୁ ବାଜି ଲଗାଇ ଲୋକଙ୍କୁ ମୃତ୍ୟୁ ମୁଖରୁ ବଞ୍ଚାଉଛନ୍ତି ଭାରତୀୟ ଯବାନ । ଏଥିପାଇଁ ଏହି ଯବାନଙ୍କୁ ସାଲ୍ୟୁଟ କରି ଧନ୍ୟବାଦ ଜଣାଇଛନ୍ତି ଜଣେ ବନ୍ୟା ପ୍ରଭାବିତ କୁନି ଝିଅ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ଭିଡିଓ ସୌଜନ୍ୟ: ଟ୍ବିଟର@ANI
ଭାଇରାଲ ହେଉଥିବା ଭିଡିଓଟି ମହାରାଷ୍ଟ୍ର ସାଙ୍ଗଲୀର ଗାଁୱବାଗର । ଭିଡିଓରେ ଏକ କୁନି ଝିଅ ସେନାର ଜଣେ ଯବାନଙ୍କୁ ସାଲ୍ୟୁଟ କରୁଛି । ଏହା ସହିତ ସେ କହୁଛି 'ଆପଣ ବହୁତ ଭଲ କାମ କରୁଛନ୍ତି' । ତେବେ ଏହାପରେ ସେ ଯବାନଙ୍କ ସହ ହାତ ମିଳାଉଥିବା ନଜର ଆସିଛି ।
ସୂଚନା ଯୋଗ୍ୟ ଯେ, ମହାରାଷ୍ଟ୍ରରେ ବନ୍ୟା ଯୋଗୁଁ ଏବେ ସୁଦ୍ଧା ପ୍ରାୟ 40 ଜଣଙ୍କ ପ୍ରାଣହାନୀ ଘଟିଥିବା ବେଳେ ଲକ୍ଷାଧିକ ପ୍ରଭାବିତ ହୋଇଛନ୍ତି ।
