ଚେନ୍ନାଇ: ଜନ୍ମଦିନ କେକକୁ ନେଇ ତୁମୁଳକାଣ୍ଡ । ତାମିଲନାଡୁରେ ଏକ ବାର୍ଥଡେ କେକକୁ ନେଇ ଆରମ୍ଭ ହୋଇଥିବା ବିବାଦର ଅନ୍ତ ହତ୍ୟାକାଣ୍ଡରେ ପରିଣତ ହୋଇଛି । ଚେନ୍ନାଇ ପୋଲିସ ଏନେଇ ଜଣଙ୍କ ହତ୍ୟା ଅଭିଯୋଗରେ କେକ ବେକେରୀର 5 ଜଣଙ୍କୁ ଗିରଫ କରିଛି ।
ଡିସେମ୍ବର 31, 2019ରେ ପୁନଥୋପ କଲୋନୀରେ ରହିବାକୁ ଥିବା ଦୁଇ ସାଙ୍ଗ କୁମାର ଓ ପୁଷ୍ପରାଜନଙ୍କର ଏକ ଗ୍ୟାଙ୍ଗ ସହ ମାରପିଟ ହୋଇଥିଲା । ଏମାନେ ଅର୍ଡର କରିଥିବା ଜନ୍ମଦିନ କେକର ଡେଲିଭରୀରେ ବିଳମ୍ବ ହେବାକୁ ନେଇ ବେକେରୀ କର୍ମଚାରୀଙ୍କ ସହ ବିବାଦ ହୋଇଥିଲା ।
ଡେସେମ୍ବର 31 ରେ କୁମାରର ଜନ୍ମଦିନ ଥିଲା । ଦୁହେଁ ଜନ୍ମଦିନ ସେଲିବ୍ରେଟ କରିବାକୁ ଯାଇ କେକ ଅର୍ଡର ଦେଇଥିଲେ । ମାତ୍ର କେକ ଡେଳିଭରୀ ଦେବାରେ ବିଳମ୍ବ ହେବାରୁ ଏହାକୁ ନେଇ ବେକେରୀ କର୍ମଚାରୀଙ୍କ ସହ କଥା କଟାକଟି ହୋଇଥିଲା । ଏହାସହ କେକର ଡିଜାଇନ ନେଇ ମଧ୍ୟ ଝଗଡା ହୋଇଥିଲା ।
ଏନେଇ ପୋଲିସର କହିବା କଥା, ଏହି ବିବାଦ ପରେ ଦୁଇ ସାଙ୍ଗ ଘରକୁ ଫେରୁଥିବା ସମୟରେ ରାସ୍ତାରେ 10 ଜଣ ତାଙ୍କ ଉପରକୁ ମାରଣାସ୍ତ୍ର ଧରି ସଙ୍ଘବଦ୍ଧ ଆକ୍ରମଣ କରିଥିଲେ । ଯେଉଁଥିରେ ଉଭୟ ଗୁରୁତର ହୋଇଥିବାବେଳେ ସେମାନଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ଚିକିତ୍ସାଧୀନ ଅବସ୍ଥାରେ ପୁଷ୍ପରାଜନର ମୃତ୍ୟୁ ଘଟିଛି ।
ଏହାକୁ ନେଇ ପୋଲିସ ଏକ ମାମଲା ରୁଜୁ କରିବା ସହ 5 ଜଣଙ୍କୁ ହତ୍ୟା ଅଭିଯୋଗରେ ଗିରଫ କରି ପଚରାଉଚରା ଜାରି ରଖିଛି । ଅନ୍ୟ ସନ୍ଦିଗ୍ଧଙ୍କୁ ଧରିବାକୁ ପୋଲିସ ଖୋଳତାଡ ଜାରି ରଖିଥିବାବେଳେ ପ୍ରାଥମିକ ତଦନ୍ତରୁ ଅଭିଯୁକ୍ତମାନେ ବେକେରୀ କର୍ମଚାରୀଙ୍କ ସହ ବନ୍ଧୁତା ଥିବା ଜଣାପଡିଛି ।
