ଶ୍ରୀନଗର: ବାରମ୍ବାର ତାଗିଦ ସତ୍ତ୍ବେ ସୁଧୁରୁନି ପାକିସ୍ତାନ । ଲଗାତାର ସୀମାରେ ଅସ୍ତ୍ରବିରତି ଉଲ୍ଲଙ୍ଘନ କରିଚାଲିଛି । 2 ଦିନର ବିରତି ପରେ ପୁଣି ଜମ୍ମୁ ଓ କାଶ୍ମୀର ସୀମାରେ ଚାଲିଛି ପାକିସ୍ତାନ ସେନାର ଗୁଳି ।
ସେନା ସୂଚନାନୁସାରେ ସୋମବାର ପୁଞ୍ଚ ଜିଲ୍ଲାର 2ଟି ସ୍ଥାନରେ ପାକ ପକ୍ଷରୁ ଅସ୍ତ୍ରବିରତି ଉଲ୍ଲଙ୍ଘନ ହୋଇଛି । ପାକିସ୍ତାନ ସେନା ଭାରତୀୟ ପୋଷ୍ଟ ଉପରକୁ ଆଖିବୁଜା ଗୁଳି ଚାଳନା କରିଛନ୍ତି । ଲଗାତାର ଏହି ଗୁଳିମାଡ ସହ ପାକ ସେନା ଜୋରଦାର ଆକ୍ରମଣ କରିଥିବା ଜଣାପଡିଛି । ତେବେ ଏଥିରେ କୌଣସି କ୍ଷୟକ୍ଷତି ହୋଇନଥିବା ସୂଚନା ରହିଛି । ଭାରତୀୟ ସେନା ପକ୍ଷରୁ ଏହାର ଦୃଢ ଜବାବ ଦିଆଯାଇଛି ।
ଲଗାତାର କିଛି ସପ୍ତାହ ହେବ ପାକିସ୍ତାନ ଭାରତୀୟ ସେନାର ପୋଷ୍ଟକୁ ଟାର୍ଗେଟ କରୁଛି । ବିଭିନ୍ନ ଜାଗାରୁ ନିରାଶ ହେବା ପରେ ଏବେ ଗୁଳିମାଡ କରି ଭାରତ ଉପରେ ପ୍ରତିଶୋଧ ନେଉଛି ପାକ । ଏହାସହ ଆତଙ୍କବାଦୀ ଅନୁପ୍ରବେଶର ମଧ୍ୟ ସାହାରା ନେଉଛି ପଡୋଶୀ ଦେଶ । ପାକ ସମର୍ଥିତ ଆତଙ୍କବାଦୀଙ୍କୁ ସୀମାରେଖା ଦେଇ ଅନୁପ୍ରବେଶ କରାଇବା ଲାଗି ଏହା ନୂଆ ଉପାୟ ଆପଣାଇଛି ।
ପ୍ରଥମେ ଆତଙ୍କବାଦୀଙ୍କୁ ସୀମାରେଖା ନିକଟରେ ଲୁଚିଛପି ଭାରତକୁ ପଶିବାର ବାଟ ବତାଉଛି । ଆଉ ଯେତେବେଳେ ଏମାନେ ରାତି ଅଧରେ ଏହି ଅନୁପ୍ରବେଶ କରୁଛନ୍ତି ସେତେବେଳେ ପାକିସ୍ତାନ ସେନା ଭାରତୀୟ ସେନାର ପୋଷ୍ଟକୁ ପ୍ରବଳ ଗୁଳିମାଡ କରୁଛି । ଫଳରେ ଭାରତୀୟ ସେନାର ନଜର ଗୁଳିର ଜବାବ ଦେବା ଉପରେ ରହିବ ଏବଂ ଆତଙ୍କୀ ସହଜରେ ଅନୁପ୍ରବେଶ କରିପାରିବେ । ତେବେ ଭାରତୀୟ ଯବାନଙ୍କ ଦୃଢ ପଦକ୍ଷେପ ଓ ପହରା ଯୋଗୁଁ ପାକିସ୍ତାନର ଏହି ଚାଲ ଅନେକ ଥର ପଣ୍ଡ ହୋଇଛି । ଏହାସହ ସେନା ହାତରେ ଅନେକ ଆତଙ୍କବାଦୀ ମଧ୍ୟ ନିକଟରେ ଧରା ପଡିଛନ୍ତି ।
