ନୂଆଦିଲ୍ଲୀ: କୃଷି ଆଇନକୁ ନେଇ କେନ୍ଦ୍ର ଉପରେ ବର୍ଷିଛି ବିଏସପି । ଚାଷୀଙ୍କ ପ୍ରତି ସରକାର ଆପଣାଇଥିବା ଆଭିମୁଖ୍ୟକୁ ଦଳର ସାଂସଦ ସତୀଶ ଚନ୍ଦ୍ର ମିଶ୍ର ନିନ୍ଦା କରିଛନ୍ତି । ଏହାସହ କୃଷି ଆଇନକୁ ରଦ୍ଦ କରିବାକୁ ସେ ରାଜ୍ୟସଭାରେ କହିଛନ୍ତି ।
ରାଜ୍ୟସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନାରେ ଭାଗ ନେଇ ସେ ଏପରି କହିଛନ୍ତି । ଏହି ସମୟରେ ସାଂସଦ କହିଛନ୍ତି, ‘ବିଜେପି ସରକାର ଚାଷୀ ଆନ୍ଦୋଳନ କରୁଥିବା ସ୍ଥାନରେ ଯବାନଙ୍କୁ ମୁତୟନ କରିଛନ୍ତି । ସେମାନଙ୍କ ଉପରେ ଟିୟର ଗ୍ୟାସ ଓ ପାଣି ପକାଉଛନ୍ତି । ଖାଦ୍ୟ ସାମଗ୍ରୀକୁ ପଠାଇବା ବନ୍ଦ କରିଛନ୍ତି । ଏପରିକି ଶୌଚାଳୟ ମଧ୍ୟ ବନ୍ଦ କରିଛନ୍ତି । ସେମାନେ ଆନ୍ଦୋଳନକାରୀଙ୍କ ମଧ୍ୟରେ ମହିଳା ଥିବା କଥା ମଧ୍ୟ ଭାବି ନାହାଁନ୍ତି । ଏହା ମାନବାଧିକାରର ଉଲଘଂନ ନୁହେଁକି ?’
ଚାଷୀମାନଙ୍କୁ ଆତଙ୍କବାଦୀ, ଦେଶବିରୋଧୀ ଦର୍ଶାଯାଉଛି । ଏପରି କରି ଚାଷୀଙ୍କ ସ୍ବରକୁ ସରକାର ବନ୍ଦ କରିପାରିବେ ନାହିଁ ବୋଲି ସେ କହିଛନ୍ତି । ତେବେ ଏହି ତିନୋଟି ଆଇନ ଚାଷୀଙ୍କ ବିରୋଧରେ ରହିଛି । ତେଣୁ ଏହାକୁ ତୁରନ୍ତ ରଦ୍ଦ କରାଯିବା ଦରକାର । ସେହିପରି ଆଇନରେ ଏମଏସପିରେ ରଖିବା ଓ ସ୍ବାମୀନାଥନ ରିପୋର୍ଟକୁ କାର୍ଯ୍ୟକାରୀ କରିବାକୁ ସେ ଦାବି କରିଛନ୍ତି ।
ସୂଚନାଥାଉକି, ନୂଆ କୃଷି ଆଇନକୁ ବିରୋଧ କରି ନଭେମ୍ବର 26 ତାରିଖରୁ ଚାଷୀମାନେ ଦିଲ୍ଲୀ ସୀମାରେ ଆନ୍ଦୋଳନରେ ବସିଛନ୍ତି ।
