ମୁମ୍ବାଇ: ଗୁରୁବାର ମୁମ୍ବାଇ ସିଏସଟି ରେଳ ଷ୍ଟେସନ ନିକଟରେ ଗୁରୁବାର ସଂଧ୍ୟାରେ ଭୁଶୁଡିଥିଲା ଫୁଟ ଓଭର ବ୍ରିଜ । ଏଥିରେ ପ୍ରାଣ ହରାଇଥିଲେ 6 ଜଣ । ଆଉ ଗୁରୁତର ଆହତ ହୋଇଥିଲେ 30ରୁ ଊର୍ଦ୍ଧ୍ବ ଲୋକ । ତେବେ ଏନେଇ ଅନେକ ବିଏମସିକୁ ଦାୟୀ କରିଥିଲେ । ଆଉ ଘଟଣାର ତଦନ୍ତ ପାଇଁ ମୁଖ୍ୟମନ୍ତ୍ରୀ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ । ଏହାସହ ମୃତକଙ୍କ ପରିବାରକୁ 5 ଲକ୍ଷ ଟଙ୍କା ଏବଂ ଆହତଙ୍କ ଚିକିତ୍ସା ପାଇଁ 50 ହଜାର ଲେଖାଏଁ ସହାୟତା ରାଶି ଘୋଷଣା କରିଥିଲେ ।
ତେବେ ଏହି ଘଟଣାରେ ଦୋଷୀ ଭାବେ 2 ଜଣ ଇଞ୍ଜିନିୟରଙ୍କୁ ଚାକିରିରୁ ନିଲମ୍ବିତ କରାଯାଇଛି । ଘଟଣା ପରେ ମୁଖ୍ୟମନ୍ତ୍ରୀ ଫଡନାଭିସ ଉଚ୍ଚସ୍ତରୀୟ ତଦନ୍ତ କଥା କହିଥିଲେ । ଏହାପରେ ଶୁକ୍ରବାର ବିଏମସି କମିଶନର ଅଜୟ ମେହତା ଦୁଇ ଜଣଙ୍କ ନିଲମ୍ବନ ପରେ ସେମାନଙ୍କ ବିରୁଦ୍ଧରେ ଯାଞ୍ଚ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।
2017-18 ରେ ବ୍ରିଜର ନିର୍ମାଣ ଯାଞ୍ଚ କରିଥିବା ଏକଜିକ୍ୟୁଟିଭ ଇଞ୍ଜିନିୟର ଏଆର ପାଟିଲ ଏବଂ 2013-14ରେ ବ୍ରିଜର ମରାମତି ପାଇଁ କାମ କରୁଥିବା ଆସିଷ୍ଟାଣ୍ଟ ଇଞ୍ଜିନିୟର ଏସଏଫ କଲକୁଟ୍ଟେଙ୍କୁ ନିଲମ୍ବନ କରାଯାଇଛି । ଫୁଟ ଓଭର ବ୍ରିଜ ଭୁଶୁଡିବା ଘଟଣାରେ ପୋଲିସ ଆଜାଦ ନଗର ଥାନାରେ ମାମଲା ରୁଜୁ କରିଛି । ଆଇପିସି ଧାରା 304 ଏ ଏବଂ 338ରେ ମାମଲା ରୁଜୁ କରାଯାଇଥିଲା।
