ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ ଆଜି ନିର୍ବାଚନୀ ଇସ୍ତାହାର ଜାରି କରିବ ବିଜେପି । ଏହି ଇସ୍ତାହାର କେନ୍ଦ୍ରମନ୍ତ୍ରୀ ନୀତିନ ଗଡକରୀ ଏବଂ ପ୍ରକେଶ ଜାଭେଦକର ଦିଲ୍ଲୀ ବିଜେପି କାର୍ଯ୍ୟାଳୟରେ ଜାରି କରିବେ । ଏହି ଅବସରରେ ବିଜେପି ଉପସଭାପତି ଶ୍ୟାମ ଜାଜୁ, କେନ୍ଦ୍ରମନ୍ତ୍ରୀ ହର୍ଷବର୍ଦ୍ଧନ, ଦିଲ୍ଲୀ ବିଜେପି ଅଧ୍ୟକ୍ଷ ମନୋଜ ତିୱାରୀ ଏବଂ ପୂର୍ବତନ କେନ୍ଦ୍ରମନ୍ତ୍ରୀ ବିଜୟ ଗୋଏଲ ପ୍ରମୁଖ ଏହି ସମୟରେ ଉପସ୍ଥିତ ରହିବେ ।
ବିଜେପି ଦ୍ବାରା ଜାରି ହେବାକୁ ଥିବା ଏହି ନିର୍ବାଚନୀ ଇସ୍ତାହାରରେ 3ଟି ପ୍ରସଙ୍ଗକୁ ଗୁରୁତ୍ବ ଦିଆଯାଇପାରେ ବୋଲି ସମ୍ଭାବନା ରହିଛି । ତାହା ହେଉଛି ପ୍ରଦୂଷଣ ମୁକ୍ତ ଦିଲ୍ଲୀ, ଯମୁନା ରିଭର ଫ୍ରଣ୍ଟ ଏବଂ ଝୁମ୍ପୁଡିରେ ରହୁଥିବା ଲୋକଙ୍କୁ ଘର ଯୋଗାଇବା । ନିର୍ବାଚନୀ ଇସ୍ତାହାର ଜରିଆରେ ଭୋଟରଙ୍କୁ ଆକୃଷ୍ଟ କରିବା ପାଇଁ ଚଳିତ ଥର ବିଜେପି ଭିନ୍ନ ଏକ ରଣନୀତି ଆପଣାଇଛି । ନିର୍ବାଚନୀ ଇସ୍ତାହାର ପ୍ରସ୍ତୁତ ପାଇଁ ବିଜେପି ଦିଲ୍ଲୀରେ 'ମୋ ଦିଲ୍ଲୀ ମୋ ପରାମର୍ଶ' ନାମକ ଅଭିଯାନ ଆରମ୍ଭ କରିଥିଲା ।
ସେପଟେ ଅନ୍ୟ କୌଣସି ଦଳ ଏବେ ସୁଦ୍ଧା ନିର୍ବାଚନୀ ଇସ୍ତାହାର ଜାରି କରିନଥିବା ବେଳେ ଶାସକ ଦଳ ଆମ ଆଦମି ପାର୍ଟି କେଜରିୱାଲ ଗ୍ୟାରେଣ୍ଟି କାର୍ଡ ଜାରି କରିଛି ।
