ନୂଆଦିଲ୍ଲୀ: ଉନ୍ନାଓ ଗଣଦୁଷ୍କର୍ମ ମାମଲାର ଅଭିଯୁକ୍ତ କୁଲଦୀପ ସିଂହ ସେନଗାରଙ୍କ ସମେତ ଅନ୍ୟ ଅଭିଯୁକ୍ତଙ୍କ ନାମରେ ପ୍ରଡକ୍ସନ ୱାରେଣ୍ଟ ଜାରି କରାଯାଇଛି । ସିବିଆଇ ଟିମର ଚାର୍ଜସିଟ ଦାଖଲ ପରେ ଦିଲ୍ଲୀର ତିସହଜାରୀ କୋର୍ଟ ଏହି ୱାରେଣ୍ଟ ଜାରି କରିଛନ୍ତି । ମାମଲାର ଶୁଣାଣି କୋର୍ଟରେ ଅଗଷ୍ଟ 5 ରୁ ହେବ । ସେମାନଙ୍କୁ ଅଗଷ୍ଟ 5 ତାରିଖ 12 ଟା 30 ସମୟରେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି ।
ସେପଟେ ଲକ୍ଷ୍ନୌର କେଜିଏମୟୁ ଟ୍ରମା ସେଣ୍ଟରରେ ଭର୍ତ୍ତି ଥିବା ଉନ୍ନାଓ ଗଣଦୁଷ୍କର୍ମ ପୀଡିତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇଛି । କୋମା ଅବସ୍ଥାରେ ଥିବା ପୀଡିତା ଜ୍ବର ପରେ ନିମୋନିଆର ଶିକାର ହୋଇଥିବା ଡାକ୍ତର କହିଛନ୍ତି ।
ସୂଚନାଯୋଗ୍ୟ ଯେ, 2017 ଜୁନ 4 ରେ ଜଣେ ନାବାଳିକା ଝିଅ ବିଧାୟକ ସେନ୍ଗାରଙ୍କ ବିରୋଧରେ ଦୁଷ୍କର୍ମ ଅଭିଯୋଗ ଆଣିଥିଲେ। ଏହାପରେ ସେ ଗିରଫ ହୋଇଥିଲେ । ଏବେ ଏହି ଦୁଷ୍କର୍ମ ମାମଲାର ତଦନ୍ତ ସିବିଆଇ କରୁଛି।
ସେପଟେ ପୀଡ଼ିତା ରାଏବରେଲୀରେ ଥିବା ତାଙ୍କ ସମ୍ପର୍କୀୟଙ୍କ ଘରକୁ କାରରେ ଯାଉଥିବା ବେଳେ ଟ୍ରକ ଦୁର୍ଘଟଣାରେ ସମ୍ମୁଖୀନ ହୋଇଥିଲେ । ଏହି ଦୁର୍ଘଟଣାରେ ତାଙ୍କର ମାଉସୀ ଏବଂ ଖୁଡ଼ୀଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ଓକିଲ ଏବଂ ସେ ଗୁରୁତର ଆହତ ହୋଇଥିଲେ ।
