ନୂଆଦିଲ୍ଲୀ: ଦ୍ବିତୀୟଥର ପାଇଁ ଗୁରୁବାର ପ୍ରଧାନମନ୍ତ୍ରୀ ଭାବରେ ଶପଥ ନେବେ ନରେନ୍ଦ୍ର ମୋଦି । ତେବେ ଏହା ପୂର୍ବରୁ ସମ୍ଭାବ୍ୟ ମନ୍ତ୍ରୀଙ୍କ ପାଖକୁ ପିଏମଓରୁ ଫୋନ କଲ ଯାଉଥିବା ଜଣାପଡିଛି । କିଛି ନୂଆ ଏବଂ କିଛି ପୁରୁଣା ନେତା ଫୋନ କଲ ପାଇଛନ୍ତି ।
ସୂତ୍ର ଅନୁସାରେ, ରାଜନାଥ ସିଂହ, ବାବୁଲ ସୁପ୍ରିୟ, ସ୍ମୃତି ଇରାନୀ, ପ୍ରକାଶ ଜାଭଡ଼େକର, ନିର୍ମଳା ସୀତାରମଣ, ମୁକ୍ତାର ଆବାସ ନକଭୀ, ଜିତେନ୍ଦ୍ର ସିଂଙ୍କ ପାଖକୁ ପିଏମଓରୁ ଫୋନ କଲ ଆସିଛି । ଧର୍ମେନ୍ଦ୍ର ପ୍ରଧାନଙ୍କ ପାଖକୁ ମଧ୍ୟ ଫୋନ କଲ ଯାଇଥିବା କୁହାଯାଉଛି ।
ଆଜି ଅପରାହ୍ନ 4.30ରେ ସମ୍ଭାବ୍ୟ ମନ୍ତ୍ରୀଙ୍କ ସହ ସାକ୍ଷାତ କରିବେ ମୋଦି । ନୂଆଦିଲ୍ଲୀର 7 ଲୋକ କଲ୍ୟାଣ ମାର୍ଗରେ ମୋଦିଙ୍କ ସହ ସମ୍ଭାବ୍ୟ ମନ୍ତ୍ରୀଙ୍କ ସାକ୍ଷାତ ହେବ । ଏନେଇ ବହୁ ନେତାଙ୍କୁ ଡକରା ଆସିଲାଣି । ପରେ ସନ୍ଧ୍ୟା 7ଟାରେ ଅନୁଷ୍ଠିତ ହେବ ଶପଥ ଗ୍ରହଣ ଉତ୍ସବ । ଏଥିପାଇଁ ରାଷ୍ଟ୍ରପତି ଭବନରେ ପ୍ରସ୍ତୁତି ସରିଛି ।
