ନୂଆଦିଲ୍ଲୀ: ରାଜ୍ୟସଭାରେ ଉଠିଲା ପଶ୍ଚିମ ଓଡିଶାରେ ସ୍ଥାୟୀ ହାଇକୋର୍ଟ ବେଞ୍ଚ ପ୍ରତିଷ୍ଠା ଦାବି । ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟ ଏହି ଦାବି ଉଠାଇବା ସହ ଏ ପ୍ରସଙ୍ଗରେ କେନ୍ଦ୍ର ସରକାର ଶୀଘ୍ର ପଦକ୍ଷେପ ନିଅନ୍ତୁ ବୋଲି କହିଛନ୍ତି ।
ପଶ୍ଚିମ ଓଡିଶାବାସୀଙ୍କ କଟକ ହାଇକୋର୍ଟ ଆସିବା ଲାଗି ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଥିବାରୁ ଏହାକୁ ଧ୍ୟାନରେ ରଖି ଶୀଘ୍ର ଏଥିପ୍ରତି ଧ୍ୟାନ ଦେବାକୁ ସେ କହିଛନ୍ତି । ଏହାସହ ପଶ୍ଚିମ ଓଡିଶାର ଯେକୌଣସି ସ୍ଥାନରେ ଏହି ସ୍ଥାୟୀ ବେଞ୍ଚ ପ୍ରତିଷ୍ଠା ପାଇଁ ସେ ଦାବି କରିଛନ୍ତି । ସେହିପରି ରାଜ୍ୟସରକାର ଏଥିନେଇ ଭିତ୍ତିଭୂମି ଯୋଗାଇଦେବାକୁ ରାଜି ଥିବାରୁ ସ୍ଥାୟୀ ବେଞ୍ଚ ପ୍ରତିଷ୍ଠା ନେଇ ଯଥାଶୀଘ୍ର ପଦକ୍ଷେପ ନେବାକୁ ସେ କହିଛନ୍ତି ।
ସେପଟେ ଆସନ୍ତାକାଲି ଠାରୁ ପଶ୍ଚିମ ଓଡିଶାରେ ସ୍ଥାୟୀ ବେଞ୍ଚ ପ୍ରତିଷ୍ଠା ଦାବିରେ ଆନ୍ଦୋଳନ ହେବାକୁ ଥିବା ଓ ଏହାକୁ ପ୍ରାୟ ସମସ୍ତେ ସମର୍ଥନ କରୁଥିବା ଦର୍ଶାଇ ଏଥିପ୍ରତି ଧ୍ୟାନ ଦେବାକୁ ସେ କେନ୍ଦ୍ର ଆଇନ ମନ୍ତ୍ରୀଙ୍କୁ ଅନୁରୋଧ କରିଛନ୍ତି ।
ସୌଜନ୍ୟ: ରାଜ୍ୟସଭା ଟିଭି
