ପାଟନା: ବିହାର ମୋକାମାର ବାହୁବଳି ବିଧାୟକ ଆଉ ପୋଲିସ ମଧ୍ୟରେ ଲୁଚକାଳି ଖେଳର ଅନ୍ତ ଘଟିଛି । ଶେଷରେ ପୋଲିସ ବିଧାୟକ ଅନନ୍ତ ସିଂହଙ୍କୁ ଗିରଫ କରିବାରେ ସଫଳ ହୋଇଛି । ପ୍ରଥମେ ରବିବାର ଅନନ୍ତ ସିଂଙ୍କୁ ପାଟନା ଜେଲ ନିଆଯାଇଥିଲା ପରେ କଡା ସୁରକ୍ଷା ଭିତରେ ତାଙ୍କୁ ବାଢ କୋର୍ଟକୁ ପଠାଯାଇଥିଲା । ଏହାପରେ 5 ଦିନ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ତେବେ ବେଉର ଜେଲ ହେଉଛି ଏକ କେନ୍ଦ୍ରୀୟ କାରାଗାର । ଯେଉଁଠି କୁଖ୍ଯାତ ଅପରାଧୀ ମାନେ ସଜା କାଟୁଛନ୍ତି ।
ସୂଚନାମୁତାବକ, ଅନନ୍ତ ସିଂହଙ୍କୁ ଜେଲର ଡିଭିଜନ ଓ୍ବାର୍ଡରେ ରଖାଯାଇଛି । ଏହି ଓ୍ବାର୍ଡରେ ଅନନ୍ତ ସଂହଙ୍କୁ ଏକ ଚୌକି, ବେଡ, ଗୋଟେ ଟେବୁଲ ଦିଆଯାଇଛି । ଉକ୍ତ ଓ୍ବାର୍ଡକୁ ଯିବା ପୂର୍ବରୁ ବିଧାୟକଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇଥିଲା । ଏହାପରେ ତାଙ୍କୁ ଖାଇବାକୁ ଦିଆଯାଇଥିବା ସତ୍ତ୍ବେ ସେ ନଖାଇ କେବଳ ପାଣି ପିଇଥିଲେ ।
ସୂଚନାମୁତାବକ, ବିଧାୟକ ଅନନ୍ତଙ୍କ ଘରୁ ଏକ ଏକେ-47 ଓ 2ଟି ହ୍ୟାଣ୍ଡ ଗ୍ରେନେଡ ଜବତ ହୋଇଥିଲା । ଏହାପରେ ସେ ଫେରାର ଥିଲେ । ପୋଲିସର ବହୁ ଖୋଜାଖୋଜି ପରେ ସେ ଦିଲ୍ଲୀର ସାକେତ କୋର୍ଟରେ ଆତ୍ମସମର୍ପଣ କରିଥିଲେ । ଏହାପରେ ତାଙ୍କୁ ତିହାଡ ଜେଲ ପଠାଯାଇଥିଲା । କିନ୍ତୁ ବିହାର ପୋଲିସ ତାଙ୍କୁ 4 ଦିନିଆ ରିମାଣ୍ଡରେ ନେବାପାଇଁ ଆବେଦନ କରିଥିଲା । ଏହାପରେ ଅନନ୍ତଙ୍କୁ ଟ୍ରାଁଜିଟ ରିମାଣ୍ଡରେ ନେଇଥିଲା ବିହାର ପୋଲିସ । ଶେଷରେ ରବିବାର ତାଙ୍କୁ ବାଢ କୋର୍ଟରେ ହାଜିର କରିବା ପରେ କେନ୍ଦ୍ରୀୟ କାରାଗାରକୁ ପଠାଯାଇଛି ।
