କୋଲକାତା: ବିଶ୍ବର ସର୍ବବୃହତ ହେନ୍ତାଳବନ ତଥା ଜାତୀୟ ଓ ବ୍ୟାଘ୍ର ଅଭୟାରଣ୍ୟ ସୁନ୍ଦରବନରେ ଅଭାବନୀୟ ଘଟଣା । ଏକ ବେଙ୍ଗଲ ଟାଇଗର ଜଣେ ମତ୍ସ୍ୟଜୀବୀଙ୍କ ଡଙ୍ଗା ଉପରକୁ ଡେଇଁ 45 ବର୍ଷିୟ ମତ୍ସ୍ୟଜୀବୀଙ୍କୁ ସୁନ୍ଦରବନ ଭିତରକୁ ଟାଣି ନେଇଥିଲା । ଅଭୟାରଣ୍ୟ କର୍ତ୍ତୃପକ୍ଷ ଗୁରୁବାର ଏହି ସୂଚନା ଦେଇଛନ୍ତି ।
ସୂଚନା ମୁତାବକ ବୁଧବାର ସକାଳେ ଦକ୍ଷିଣ 24 ପରଗାନା ଜିଲ୍ଲାର ଗୋସାବା ବ୍ଲକର ଲାହିପୁର ଗାଁର ତିନି ଜଣ ବ୍ୟକ୍ତି ମାଛ ଧରିବାକୁ ଯାଇଥିଲେ ।
ସେମାନେ କାଲିଚର କ୍ରିକରେ ମାଛ ଧରୁଥିବାବେଳେ ଏକ ବାଘ ଡଙ୍ଗାରେ ଥିବା ସୁଜିତ ମୋଣ୍ଡାଲଙ୍କୁ ଆକ୍ରମଣ କରିଥିଲା । ଅଧିକାରୀ କହିଛନ୍ତି ଯେ ବାଘ ତାଙ୍କୁ ଜଙ୍ଗଲ ଭିତରକୁ ଟାଣି ନେଇଥିଲା । ମୋଣ୍ଡାଲଙ୍କ ମୃତଦେହ ଏପର୍ଯ୍ୟନ୍ତ ଉଦ୍ଧାର କରାଯାଇ ନାହିଁ ବୋଲି ସେ କହିଛନ୍ତି । ସୁନ୍ଦରବନ ରୟାଲ ବେଙ୍ଗଲ ଟାଇଗରଙ୍କ ପାଇଁ ପ୍ରସିଦ୍ଧ ।
